謝霆鋒進化演唱會　為觀眾帶來盡興一夜

暌違二十多年，謝霆鋒再次舉辦個人演唱會，更成為首個喺啟德主場館舉行嘅香港歌手。佢亦不負眾望，為觀眾帶嚟盡興一夜。
（我係睇26/4 第三場）

「剩下口耳眼鼻纏住妳 該不該歡喜 心似羽毛 隨時被吹起」

演唱會先以幾首充滿力量嘅情歌開場，帶旺氣氛後就接連演繹幾首電影主題曲，勾起觀眾滿滿回憶。之後仲玩曬成個場，同樂迷一齊大合唱，再溫柔演繹苦情歌。最後以搖滾作品謝幕，壓軸嘅《活著Viva》更加係全場high爆。完場說話都唔多講，一個瀟灑轉身就走人，只可以話成件事好謝霆鋒😂

「假使當初可以為了你 忘了愛所有人 分開手去追尋 足可擁抱千萬人」

整晚氣氛一如所料地超好，演出非常豐富。霆鋒一個人一枝結他已經型到癲，個份舞台魅力足以證明佢係一位巨星。舞台效果仲令我大開眼界，特別係啲快歌，係香港演唱會從未見過嘅場面，令歌曲更震撼。我就最鐘意《潛龍勿用》，強勁音樂配上巨型拱門舞台，霸氣盡露。

「為何拿甜言蜜語印証你嘴巴有用 別以為長期陪著我會廢掉嘴角武功」

而數到全晚最開心絕對係聽到一堆經典情歌，真係首首都聽到起曬雞皮，最驚喜係有《早知》同《一擊即中》！另外，現場欣賞先發覺，霆鋒嘅情歌前奏同間奏，不論係結他定琴，同樣係超級感人，將歌曲情感昇華，好少廣東歌比到依種感覺我。

「我太任性 按我高興 偶爾遇上 無從平靜 由從前相戀一剎早知這結果 縱使深深愛過」

我並唔係生於謝霆鋒當紅嘅年代，係到大概十年前機遇巧合下聽到《愛後餘生》同《非走不可》，一聽著迷，慢慢成為佢嘅歌迷。隨年歲漸長，仲越嚟越識欣賞佢嘅作品，同樣係苦情歌，無咩人唱到佢嘅味道，屢聽不厭。

「最寬廣的公園遊樂過 為何認真 若我尚佔一席位 都想入座 觀賞這個驚險人生」

依個演唱會實在太精彩，每首作品，一字一句都承載大家嘅青春。希望霆鋒嚟緊會繼續做廣東歌，如果出返首情歌就正了！

「踏上分手這條路 才令我突然看到 你的天空宇宙只夠我流淚 不可跳舞」

題外話講下啟德個場，我最近一次過睇咗Coldplay同霆鋒，二樓五樓都坐過。

先講優點，入場散場真係好快，唔太需要等。附近配套充足，睇show前食下野行下街，再慢慢行去場館，隔離都係一齊睇show嘅樂迷，好似緊參與一場慶典，依種感覺暫時係其他香港場地做唔到嘅。去到場內，搵位簡單，廁所數量充足，食物一定唔平但算係合理價錢，同舞台距離亦無想像中咁遠，音響去到五樓都算唔錯。

再講講缺點，首先五樓水機唔足夠，去到後期仲要無曬紙杯。而個位本身唔算太闊，出入頗不便，亦無位放野食野飲，飲品又唔可以有蓋，所以兩次我都見到唔止一個觀眾倒瀉野，係有啲狼狽，相信依個係唔少大場嘅通病。

不過，整體而言我兩次嘅體驗都非常滿意，好開心香港終於有依個規模嘅場地！

「任何事亦難像青春般清脆 快活到 每日大一歲」

▼Follow hkpopculturelover
Instagram: https://www.instagram.com/hkpopculturelover/