馬拉松與人：Candy 首爾馬拉松

Seoul Marathon 2025
首爾馬拉松2025，第7個全馬順利完成
3:26:43 ▶️ 3:20:09 PB 🆙

比賽前2個星期已經戴返口罩守身如玉咁唔食熱氣同生冷嘢，但最終都係守唔住，比賽前個禮拜感…冒…兩課練唔到…easy 6分披都無氣，但可能係咁俾我休到極致，因病得福。

比賽前天氣預測已經話凍亦都係預計中嘅雨天還好係毛毛雨而無落雪，出發去起點氣溫6度，身上同手套都貼晒暖包打算邊跑邊掉。

起跑咗20分鐘仲係熱唔到身，俾320波波追過果刻同自己講：慢慢嚟，追得返嘅。跑到8k左右魔鬼突然間出咗嚟：咁近酒店不如返上去算啦😈 另一邊👼 又出嚟話：再跑多陣試吓先啦 … 真係跑到精神分裂🤣 跑跑吓開始順，就跟吓車，一路同個差不多pace嘅oppa猜咗15k ，去到25K因為我想試吓加速就走咗啦。

30K後一路都係食自己，一路跑個口凍到一路噴煙，手係凍到赤，睇返原來最凍嘅時候得2度，有時大風就匿埋喺啲oppa後邊，佢哋都好紳士咁知道你想擋風都俾你跟，一邊跑又留意吓身體咩狀況，係有啲攰但感覺良好，但唔敢加太多想留力38K上橋上2K暗斜，落斜都忍住腳唔加因為怕抽，一去到40K再加。

嘩，轉個灣轉左方向就大逆風，又去搵oppa擋風，但跟跟吓佢揮手叫我上，明啦…👌🏽 最後大直路望錶原來有機會追到319，又試吓啦… 最終3:20:09過拱門，其實呢個時間只係正常狀態下嘅低標，但對一個比賽前一晚仲食緊傷風感冒藥同頭痛既人嚟講…應該可以接受嘅。☺️

首爾馬氣氛超正，9成路段都有人打氣，啲人嗌到你會覺得嘈嗰隻，同埋我見到幫手噴噴嘅人會追住你嚟噴，唔使個跑手停低㗎！

而路線係絕對值得encore嘅，但配套就…有好多進步空間啦，跑跑吓會有人衝出嚟過馬路，個expo好少嘢睇而仲要室外，相機係多但大多都係人哋跑會嘅攝影師，大會攝影係無提示㗎，同埋我攞返行李拎電話出嚟既時間，個Mon貼多左條裂痕…我懷疑佢粗暴對待過我個袋囉！🥲

多謝教練@yu_hin_wa 我話想做320嘅時候你話我哋一齊努力，但我諗你都唔記得你有講過㗎啦，好啦，而家國家又有任務俾你啦，我地又試吓next level好唔好呢？🤭

多謝 ⭐️⭐️@singsing.hiking_running 嚟食花生同接放學，我凍到成身都控制唔到咁震嘅時候，一齊去買熱朱奶果吓真係好鬼sweet！😘

多謝今次小旅伴Mandy @simandy88 俾我做一個唔用腦嘅人😆 多謝肥脾 @pheobe_chow 唔同層面既support在心中呀！🤛🏽

最後，感謝賽道，
感謝身體俾我任性，
感謝所有不期而遇又擦身而過嘅神奇聯繫。

今次嘅學習位係：讓子彈飛
不急於一時，當時間一到，
要發生嘅嘢就會發生。

Please follow Insports Hub on Facebook & Instagram
https://insportslab.com/
FB
https://www.facebook.com/insportslab
IG
https://www.instagram.com/insportslab/