上環高級淮揚食府「江蘇銘悅」 讓大閘蟹開啟秋冬大門
讓大閘蟹開啟秋冬大門～🦀
每年秋冬，唔食返隻大閘蟹，感覺等於白過啦！😗年年我都搵好味嘅蟹宴，今年我心水就係上環嘅高級淮揚食府「江蘇銘悅」，人均300左右，十味料理，真係 CP值好高！
（由於食咗好多，介紹幾款必食料理）
✨清燉蟹粉獅子頭
好多時食獅子頭都係紅燒，我都係第一次試到清燉嘅版本！呢款當然無紅燒咁香口，但肉及蟹粉嘅鮮甜更為突出，飲埋啖火腿湯，暖下個胃，預備食大閘蟹都唔錯！
✨清蒸大閘蟹
之後就到咗大閘蟹，唔使講啦，隻隻都捉六両重蟹公，加埋大過我隻手掌，太肥美啦！今年雖然我錯過咗食蟹乸，不過蟹公勝在多膏，食落去口感特別滑嫩，簡簡單單清蒸已經好食到啜手指！😚
✨西施白玉球蟹黃粉
大大隻海蝦下面，有一層水蒸蛋，上面淋咗啲蟹黃粉，鮮味十足！我鍾意呢一個餸，佢有三重口感，蝦肉彈牙，水蛋嫩滑，蟹粉解甜，基本上冇咩位投訴。
✨蟹黃粉菊花桂魚
呢味二龍戲珠嘅酥炸桂魚，擺盤真係好有氣勢！侍應會喺上面淋上蟹黃粉，魚肉入口酥脆，配合鮮甜嘅蟹黃，好啱鍾意香口嘢嘅人！不過呢個餸真係要趁熱食，凍咗個口感會爭好遠。
✨江蘇一品八寶鴨
食咗咁多個小菜，終於有一個澱粉餸來了！不得不讚賞，江浙人做嘅八寶鴨真係好出色，喺炸得香脆嘅鴨肉內，釀有八寶糯米，糯米吸收晒鴨肉嘅香味，口感甜甜鹹鹹咁，一口接一口停唔到！
✨蟹粉小籠包
作為一餐大閘蟹宴，點少得蟹粉小籠包埋尾？呢度嘅師傅手勢好好，小籠包夾起都完全唔會有穿欄嘅情況，粉皮好煙靭！入口又爆汁嘅效果，豬油同埋蟹粉結合，肥美甘甜，天氣凍凍地食，感覺真係好幸福。
✨薑茶湯圓
甜品方面，今次係薑茶湯圓，湯圓係師傅手工包製，入面嘅芝麻蓉加咗豬油，好香嫩！我好鍾意佢個薑茶好濃，用嚟辟酒大閘蟹嘅寒涼啱晒！
🎀 記得like埋我，每日放送打卡好去處！📸
http://www.facebook.com/daydaycheckin
http://www.instagram.com/daydaycheckin