任天堂推出經典紅白機款手制 只限日本發售
呢期興玩復古，著衫要Y2K，影相要用CCD，依家連手制都要跟上潮流！早前任天堂喺日本推出咗經典紅白機款式Joy-Con手制，但就只限會員先可以購買，而近日，任天堂就宣布正式將呢款紅白機掣開放畀日本所有消費者啊！
經典紅白機Joy-Con手制嘅外觀基本上就同FC紅白機嘅手制一樣，但就因為經典紅白機Joy-Con手制嘅配置按鈕數量同標準嘅Joy-Con唔同，所以淨係可以玩到《Family Computer Nintendo Switch Online》同即將推出嘅《Nintendo World Champions》呢兩款遊戲。
前者係類似紅白機既模擬器，可以玩到好多經典舊game，Nintendo Switch Online用戶就玩到，仲要每個月都會轉game；後者都係集錦遊戲，收錄咗13款經典名作，但就唔係正經過關打爆機，而係要作出特定挑戰，例如鬥快打某個大佬或者過某一關，總共有130個挑戰關卡。雖然名義上係2隻game，但2隻都係紅白機遊戲大集會，呢個掣都可以玩到唔少內容。
經典紅白機Joy-Con手制預計會喺10月17號喺日本正式開賣，售價6578日圓（約$327港幣），抵唔抵買就見人見智啦！最可惜嘅係，呢款經典紅白機手制只會係日本發售，暫時未有計劃開放俾日本以外嘅市場，所以有興趣嘅大家就唯有自己諗下辦法啦！
同期任天堂仲公佈咗官方的Joy-Con充電架，充電方式除咗配合立架之外，仲可以拆出嚟好似一般手掣咁邊充邊玩，同類產品第三方都出唔少，終於有任天堂官方版都好嘅，不過一樣只會於日本發售。
▼Follow GadgetGang HK
YouTube: https://www.youtube.com/@GadgetGangHK
Instagram: https://www.instagram.com/gadgetganghk/