洪嘉豪新專輯《Inner | Child》　展現不一樣的面向

院長喺演唱會前推出專輯《Inner | Child》，收錄五首新作，帶大家進入依個大細路既內心世界，展現不一樣既洪嘉豪。

「如禮物落在我手 神奇而罕有 沿途和誰擁抱不怕醜」

專輯先以兩首玩味作開始。《拆禮物的孩子》唱出小孩對世界所有未知事物都有種天真憧憬，以及勇於向前探索既好奇心；《明星示範生》以快樂旋律，有趣演繹，道出小朋友總會試過幻想成為巨星，喺台上受到所有人掌聲，愉快地活在自己既世界。

「要靠我的我的彩數 最怕你的好 我也博不到 不到」

及後以風格特別既《Truth or Dare》過場。愛情其實同賭博一樣，想知道對方真正想法，就要有失去一切既準備同決心。

「越夜越壞 暴露各種計劃 萬千個預言 別困惑」

之後再帶聽眾踏入天馬行空既幻想世界。《預言家》氣勢磅礴，有點暗黑寓言故事感覺，係嘉豪從未試過既風格，喺紅館舞台上唱一定可以震撼全場，亦係我喺幾首新作中最喜歡既作品；《逆便所》講出被欺淩者無可奈何既心情，雖然已經習慣受傷，但依然會感到憤怒，構想有一日對欺淩者作出反擊，心酸中隱藏對社會既諷刺。

「我看著 漫天星 漫天星 往天上畫圓形」

走出幻想世界，小孩日漸長大，開始接觸愛情，初嘗當中既幸福甜蜜。喺《黑玻璃》內與愛人在路上飛馳，享受只有彼此既空間，再到大自然欣賞《漫天星》，無需顧慮地表露心意，簡單純真地戀愛，平淡但浪漫心動。不論係小朋友定大人，其實內心同樣渴望被愛。

「誰叫我很喜愛 凝望你側面 明明閒角 卻自覺 在放閃」

甜蜜過後，專輯以長大既苦與酸作結。即使比愛人當作笑話，傷盡內心，仍然裝作無恙，好讓自己可以繼續討對方歡笑，默默守護身旁，坦然接受依個身份，《衰仔樂園》為曾經為愛奮不顧身既每一位唱出心聲。

愛情以外，當年歲漸長，往往會變得太在意別人想法，失去當初懶理一切，勇往直前既稚氣，依個或者就係成長既無奈，每個人都必定會面對。《只要你不尷尬》提醒大家好多時候，我地只係差一份不怕尷尬既勇氣。

「縱使直接失戀 回頭亦再無台階 但我都不尷尬」

整張專輯題材豐富，緊扣主題，不論曲風、演繹都有唔少新嘗試。我強力建議大家順序欣賞，就好似經歷緊一個故事，聽完會有種感同身受，歡樂中帶點心酸。

其實每個人心中都住咗個未完全長大既細路，可惜喺生活所迫下，我地只可以從音樂中勾起童心。有時比自己做下小朋友，將成人世界既煩惱放低，用依個心中小孩治療傷口，享受一下稚氣都唔錯。

比較可惜係《My Secret Park》無加入其中，感覺幾適合接住《黑玻璃》嚟欣賞。

“I’m a superstar” “I’m a superstar”

從《Curiosity》、《Learning Curve》、《Cleanse》，再走到《Inner | Child》，每張專輯分別紀錄唔同階段、面向既院長。好慶幸能夠見證佢日漸成長，由當初只以悲情歌聞名，到今日各式各樣作品都受到樂迷喜歡，轉眼間已經成為樂壇灸手可熱既歌手。

首個紅館演唱會在即，我已經急不及待見到舞台上魅力四射既院長，為KAHO依個平凡名字唱出不平凡故事，屆時一定非常感動🥹

嘉豪紅館Good Show！

《Inner | Child》洪嘉豪
1 拆禮物的孩子
2 明星示範生
3 Truth or Dare
4 預言家
5 逆便所
6 黑玻璃
7 漫天星
8 衰仔樂園
9 只要你不尷尬

▼Follow hkpopculturelover
Instagram: https://www.instagram.com/hkpopculturelover/