原創音樂劇《三•八》觀後感　謹記人生好多事無法控制

原創音樂劇《三•八》上星期喺戲曲中心上演，我入場前對依個題材同演員組合唔敢抱太大期望，點知出到嚟各方面都出色又驚喜，仲非常感人。

（我睇 13/6 頭場）

「睜開眼睛 家徒四壁 一口嘆息 充滿壓抑 美麗遐想 沒人和應 又再想起了只得你一個旅程」

故事由三個唔同年齡層嘅女生，意外進入彌留空間後開始，再以各自嘅人物關係作推進。十八，係對愛情憧憬，對未來未知嘅年齡；二十八，往往係人生交叉點，究竟係同身邊人廝守終生，定尋找一個更好嘅伴侶？三十八，開始踏入人生中場，每日面對從未試過嘅生活壓力。

無論任何年記，總有不同難關要應對，可能會迷失難過，但要謹記人生好多事無法控制，最緊要珍惜身邊人，相信一切是最好的安排。

「重頭換個新的開端 就算不太像個樂園 也算是得到某些改變 別嫌 至少能那邊見」

三段愛情同樣有過甜蜜時刻，結局卻如此悲傷，令人惋惜，但最少彼此有好好離別，不留遺憾，終有一日可以那邊見。

我特別喜歡Tiger中間一段擔正嘅演出，打破第四道牆又符合角色，睇到觀眾拍案叫絕，佢同Chantel嘅互動亦估唔到咁有火花。

「但願今夕在情人夢裡 寫下癡心記號」

整個音樂劇非常完整，有笑有淚，笑聲同紙巾聲此起彼落。依個跨電視台嘅演員組合，每位演得又唱得，充滿新鮮感。可以咁近距離欣賞演員們精湛嘅演技同歌舞，實在太幸福，尤其最後一幕嘅企位同燈光，只可以用震撼嚟形容，依個就係舞台劇獨有嘅魅力。

「我沒記住最初怎親你面龐 還是說穿 得我 自欺 人會善忘」

劇本仲以一眾廣東流行曲串連，好多都揀得非常合適。好似《戀愛預告》道出少女初次遇上愛人嘅心動；《再不再見》唱出相愛卻要分開之心酸；《我們都是這樣長大的》為成年人嘅唏噓添上感人音符。同埋現場聽到Shiga唱《只要和你在一起》，係有種難以言喻嘅感動。音樂團隊用心嘅編曲更係錦上添花，為故事情感完美昇華。

「人群裡為人群顧慮 逃離總有逃離空虛 時而走近時而遠去 誰散與聚 都居於心裡」

最後，必須感謝監製陳恩碩，佢創立爆炸戲棚，一直推出唔同作品，為香港音樂劇開創先河。喺香港做劇場唔容易，做音樂劇更難，今次能夠欣賞到咁大規模又精彩嘅音樂劇，實在難能可貴。

除咗《三•八》，爆炸戲棚仲有其他劇目，好似長壽音樂劇《我們的青春日誌》，以及快將上演嘅《小男人周記》。希望大家試下親身入場感受，包你會鐘意！

▼Follow hkpopculturelover
Instagram: https://www.instagram.com/hkpopculturelover/