晚安莉莉《如果花火可不消散》　唱出一個甜酸交織嘅故事

晚安莉莉最近推出第二首派台作《如果花火可不消散》，唱出一個甜酸交織嘅故事。

「你知唔知有時望住啲煙花，我會以為自己見到你」

夜闌人靜時，人總喜歡回想過去，喜歡幻想未曾發生嘅將來，更會浮起在內心深處嘅人。煙花很美，在煙花下的你更美，可惜花火多燦爛都無法改變短暫嘅事實，你亦會隨之離去，留下傷痛。

「是於街角裏遇見 鳴謝霞光不照到臉 是想拉你到路燈處 留在狂想的那一面」

如果能在最夢幻嘅時間遇見你，與你一同經歷花開之瞬間；如果花火可不消散，你永遠在我身旁；如果你仍在我眼前，能再見一次。可惜世事無咁多如果，轉眼間夢醒，只剩下我與寂寥之夜空。

「如果 花火 可不消散 誰會拖緊着我？」

我地總盼望愛情能定格喺最快樂幸福嘅一剎，可惜愛情嘅火花同現實中嘅花火一樣，多美都終會消散，但亦正因有限先顯得珍貴。珍惜每次相遇，與心上人享受美麗嘅片刻，將此瞬間永遠放在心中。即使無法再遇，至少日後可以回味當中之快樂。

「在忐忑心跳背後 講句再會 卻不信未來會再會」

《如果花火可不消散》比起一首作品，更似一個帶有幻想空間嘅故事。我特別鐘意段intro，好有感覺，MV仲要拍得靚到一個點！

Band sound加上富畫面嘅情歌，係晚安莉莉最大嘅特色，剛中帶柔地將歌曲情緒唱進內心。而故事式嘅演繹，更令每次欣賞都會有新嘅體會，相當吸引。上年我喺《colours of…》聽過佢地live，vocal同樂器嘅配合簡直係世界級，幾位仲好識帶動氣氛，係充滿感染力嘅樂隊🎸

「傷口會痛時 期望你呵着我 從前事再沒問如果 抬頭晚空剩下花火」

雖然晚安莉莉今年先有正式派台歌，但依個班底以前嘅作品已經好高質，《失眠時我會呆望窗外等待你的來電》係我近年聽得最多嘅作品之一，快啲派埋《我看見今晚的月色很美，你呢？》啦！嚟緊九月仲有首個專場，非常期待！

「綻放的一剎 和 滅去的一剎 才令我可擁有一剎 花開的瞬間」

如果有機會，我依然想同你睇一次煙花🎇

《如果花火可不消散》晚安莉莉
作曲：Sinnie Ng / Chick Chan
作詞：Sinnie Ng
編曲：晚安莉莉
監製：Goro Wong

「如果 花火不消散 誰會拖緊着我？
綻放的一剎、滅去的一剎
讓我可擁有一剎 花開的瞬間
傷口會痛時 期望你呵着我
從前事再沒問如果
抬頭晚空剩下花火 ～」

▼Follow hkpopculturelover
Instagram: https://www.instagram.com/hkpopculturelover/