俠醫｜譚凱琪張曦雯「非一般」姊妹情 演自閉角色難度高

無綫劇《俠醫》昨晚（8日）播出第6集，劇情集中羅穎茵（譚凱琪Zoie飾）及羅穎琛（張曦雯Kelly飾）兩姊妹身上！穎茵由於患有自閉症，對於不少生活細節，包括食三色豆時的排序、衣服顏色及款式配搭、食早餐時間、想做的事情、要看的書，及堅持要吃「卜卜脆」食物等，都有一定程度執著、甚至說是絕不讓步，因而鬧出不少麻煩及笑話。

其中一幕穎茵強迫穎琛晨早流流起身煮早餐場口，笑料十足！劇情講述穎茵6點鐘未到就叫醒熟睡中的妹妹穎琛起身煮早餐，原本已精神不足的穎琛，以生無可戀tone為家姐𢳂一早規定好的「三勺半Cereal」，不過穎茵卻有感穎琛𢳂多了半勺、遂腌臢地將多出來的半勺Cereal倒回container中；之後穎茵又批評穎琛整的多士「唔夠脆」，及燶邊蛋未夠燶邊，更不斷叫穎琛再整過，令穎琛幾陷崩潰，相當搞笑。

對於這段既搞笑、苦惱但又溫馨的，網民讚張曦雯有喜感；至於Zoie的招牌童顏，及每次都必定帶來新鮮感的演出，亦獲得認證。

對於網民受落新角色，Zoie舒一口氣，她透露事前確實做了不少功課：「我有睇咗啲documentary，知道有好多唔同類型嘅自閉症，有啲靜啲、有啲好鍾意講嘢，同埋佢哋好鍾意一樣嘢、就會即刻去研究！

咁我個角色就係對顏色好有執著，同埋要好有規律，比如食嘢要有次序、要排到好整齊，我都盡量做多啲呢啲細節位，希望可以演番出個特性，所以演嗰時成日提自己，一有呢啲嘅場口要盡量做多啲」、「另外我都有參考一啲講自閉症嘅影集，同埋有聯絡過自閉症協會等等嘅相關組織，向協會啲人了解吓自閉症同埋相關Case，睇吓可唔可以擺到啲Case落去套劇。例如有啲患者佢哋可能會大叫或者揼地，我就盡量抽一啲唔好咁小朋友嘅嘢嚟演，因為都想演出嚟唔好同觀眾想像爭太遠。都難㗎，好似講嘢嘅節奏，佢哋一般都好平，但監製陳萍會想我演得生動啲，即係有時我比較冇乜太多表情時，佢就要我生鬼番啲，要一路演一路tune，tune番啱角色定位同年紀。」

談到劇中角色為張曦雯帶來不少麻煩，Zoie笑言主要靈感是來自囡囡：「比如食早餐，因為我個角色鍾意食卜卜脆嘅嘢，一食到覺得唔夠脆嘅，就會即刻揼落去Kelly個碗度，當佢個碗係垃圾桶咁，哈哈！我覺得呢個角色都有少少似我個女，又係唔好食嗰啲嘢，佢就擺落我個碗度囉！我就拎咗佢呢啲嘢放落套劇度。」

身為人母的Zoie，現實生活中自理能力如何時，她笑言全靠囡囡「訓練」，令她由不懂照顧別人的人、變成可以照顧別人生活細節的人：「生活上可能大事方面，就係我老公照顧我，但係小事好似生活細節位、衣食住行呢啲，都係我理；我本身唔係一個好識照顧人嘅人嚟，不過有咗個女之後，我覺得自己細心咗，同埋會諗多幾步，都係一個好好嘅訓練嚟。」

（即時娛樂）