王嘉爾親揭停工背後導火線　最低潮時一度「唔想活下去」

王嘉爾（Jackson Wang）早前接受黎芷珊訪問，一連兩集《芷珊再約王嘉爾》將於11月23日在TVB推出。香港出生、韓國出道的Jackson，全球各大社交媒體追蹤人數超過一億，2023年人生第一次世界巡迴演唱會足跡遠至巴西、智利、墨西哥、北美洲甚及歐洲等超過30個城市。當年事業正值黃金期的Jackson，突然宣布要休息一年。經過一年沉澱、療傷及調整，Jackson於今年強勢回歸，並投入第二次個人世界巡唱。

在首集的《芷珊再約王嘉爾》中，芷珊與製作組赴曼谷直擊Jackson開騷盛況，再度深入探討Jackson的內心世界。向來坦誠率直的Jackson，首度在電視節目中親揭突然決定休息一年的導火線，Jackson坦言並非單一事件，期間還流露找不到擁有共同目標拍檔的那份無奈：「最重要唔係嗰件事，最重要係（啲事件）一齊360（意指所有不好的事一起發生）。對我嚟講，譬如話你呃咗（我）錢，呢啲係物質上嘅嘢，我覺得It’s ok，咁我賺得番咪得囉。同我工作嘅人，我覺得大家都係friend吖，但邊有得嚟咁多friend吖，你嘅夢想係你嘅夢想啫，人哋都有自己嘅夢想……我覺得人愈大係真係要撞板，咪當交學費，但個問題係個心。」

Jackson指由於自己年紀很小便出道，故嚴格來說每個階段對他來說都是不易應付：「我十歲練體操、之後再練劍擊，突然間天時地利人和遇到星探，之後就去韓國K-POP。我出道19歲，（嗰時）我係未ready社會，我連form 7都未畢業，你話咁嘅年紀我識鬼社會咩？！之後愈來愈多人見，我唔知點樣handle呢一切。」

談到最低潮時期，Jackson坦言有想過「唔想再活下去」：「最唔開心、最down嗰時，係乜嘢諗法都有諗過……其實你冇時間去反應，只係覺得我乜嘢都唔想做，好似覺得自己都唔知自己係邊個，我係諗過我唔想再活落去。我自己都Surprise，因為我由運動員、到練習生、再出道去海外，我覺得我係捱到嘅……」。