福岡馬拉松｜WEH跑手James PB後心得「謀事在人 成事在天」

11月9日完走福岡馬拉松，克服小腿不適、肚瀉、反胃作嘔、逆風等困難下，我以3:16:17跑出了PB。長跑比賽尤其係馬拉松，謀事在人，成事在天，只可以盡力做好準備，但係最後成功與否、做唔做到目標，未必可控。

訓練篇 – Panic Buy碳板鞋

回顧今次福岡馬拉松其中一大問題，太少著比賽用的碳板鞋練習。夏天一直專心訓練，期間參加比賽不多，至福岡馬前大約四星期前先穿碳板鞋，發現腳痛要換鞋。賽前一星期Panic Buy買了另一款碳板鞋，當時只求不會腳痛，只因沒足夠時間適應新鞋。

比賽篇 – 排除萬難抵達 A區起步

比賽日，起床感覺良好，但食早餐直至起步前，肚瀉了3至4次，帶漏慣常食的止瀉藥，只好向隊友Danny借正露丸。

因為住得近起步點，加上起步前落雨，先在酒店附近有瓦遮頭地方熱身，才上線待8時20分起步。

誰料到，太淡定就出事，大約8時到上線位置， 但原來官方8時截龍，再將唔同區域起步跑手合併。我剛巧錯過時間，要在側邊度等A至D 區跑手都上線，於最後起步區向前攝，甚至等待響槍之際繼續攝前。日本人非常好，見到號碼布是 A 區就都會讓，最後成功返去 A 區起步。

保持Enjoy the Race心態

起跑氣溫攝氏19度，陰天，雖然冇落雨，但未算最好跑的天氣，始終濕度高及未夠冷。

原計劃配速4分30秒，目標3小時10分鐘內完走，但心知肚明訓練最後階段不適裝備應， 加上最近一星期都覺得雙腳不在最佳狀態，心底早已放低要跑到3小時10分鐘內的執著。相比成績，更希望跑得開心 Enjoy the Race。

首5公里，盡量跟隨手錶4分20至30配速，漸漸發現很可能只捱到30多公里，決定不太進取，將配速放慢到至4分30至35秒。

第7至8公里，離開福岡市，一路向西，沿海跑，逆風影響配速，只能勉強維持4:35，同時雙腳亦用更多力。

早段小腿肌肉已繃緊

去到十多公里，右腳小腿肌肉繃緊，心想：「大鑊喇，跑咗三分一對腳就緊。正常應該係去到半馬後先出現，而家提早成10公里」 。想過放慢步伐，穩陣完賽，但練了就不想浪費，繼續試，最多抽住筋衝線！ 配速一直都保持於4分40秒內。

第20公里，一條長命斜上得特別辛苦，而且遇着烈陽，跑手不停超越我，只覺覺得出咗七成力去跑頭半程，心想：「攰到好似跑咗30公里，點算呀！」

幸好，由20到25公里落斜順暢加上順風。半程時間是1小時36分46秒，平均配速都追得返在4分40秒內，而且對腳回魂，有返力，有信心完賽和 PB （原PB 3小時16分57秒)。

好景不常，右邊小腿肌肉繃緊，又要面對大逆風，只可以跑到 4分40秒，去到30公里時上斜，果斷地於29公里飲定抽筋水。始終跑完斜路消耗體力，去到後段十分攰，盡量保持跑姿與節奏，速度略慢了。

39公里水站後 邊嘔邊跑

堅持到36公里後，食完原定最後一包能量啫喱，38公里原本想輕輕加速，竟然撞牆，突然個肚又餓又胃痛。跑至39公里有水站食後備一包「急救」，卻嚴重反胃，只好一路嘔一路跑，速度放慢到4分50秒。

一直頂在5分內，去到41公里時Danny追到平排，我盡量加速仍然被佢甩開。之後，隊友Leo牆邊一路拍片打氣，一路陪跑近600米，受鼓勵下成功加速，最後忍住無嘔衝線。

PB時間是3小時16分17秒，這麼多狀況來說滿意！回顧途中幾乎所有決定，自覺做得幾啱。

雖然成績對不住準備多時的訓練，但好開心與滿意自己比起以前更加享受比賽，少咗因為跑不到快而唔開心。比賽盡力跑和好好享受，已經開心與滿足。

P.S. 完賽後，行兩步就瘋狂連嘔三、四次，職員都推輪椅問我要不要坐。

▼ Follow Weak Ends Here
Instagram: https://www.instagram.com/weak.ends.here/
Facebook: https://www.facebook.com/weak.ends.here/
Website: https://www.weakendshere.hk/