李幸倪巡迴School Tour有成果　突收一位母親私訊感滿足

歌手李幸倪（Gin Lee）近半年來不斷到不同學校進行School Tour，近日她收到一位母親的私訊，內容令她不禁分享上社交平台：「佢話見到我哋喺校內表演嘅片段，畫面入面見到佢個囡囡笑得好燦爛。佢話知道囡囡讀書壓力好大，有時除咗講句『加油』，都唔知可以點樣安慰佢，但見到我哋入到學校，為佢哋帶嚟歡樂，佢真係好感激我哋！」Gin Lee直言這個私訊令她回想起做School Tour的初衷。

她感慨道：「最近真係幾忙，一方面要做導師，有時一做就做到凌晨；另一方面工作壓力都唔細，有時都會諗：『可唔可以偷下懶，抖一抖？』但每次去到學校，見到佢哋咁投入、咁開心，我就知道我點都要繼續堅持落去，繼續回應佢哋嘅期待。」

Gin Lee續指每次都會同同學仔分享自己點樣面對壓力，雖然不知可以幫到幾多，但至少想他們知道：你不係一個人，你不孤單，而雖然每次見到嘅同學仔未必好多，但她相信積少成多：「無論你係尖叫嘅、一齊唱嘅，定係企喺最後靜靜聽嘅——你哋每一個反應，我都記得。多謝你哋俾我機會，帶住我嘅歌，走入你哋嘅校園。對我嚟講，每一次都係一份珍貴嘅回憶。記住，你比你想像中更加強大。」

東網網站 : https://on.cc/東網Facebook專頁 : https://www.facebook.com/onccnews/