【Tyson Yoshi 入血的1994】】

兩年前，Tyson Yoshi推出第二張專輯《2nd PRE EVOLUTION》，當時他揚言第三張專輯將會迎來重大蛻變——一個全新的Tyson Yoshi。兩年後的春天，Tyson為樂迷帶來〈1994〉這首「佬味」極重的歌曲；誓要在三十歲這個人生check point，回到他的「根」：廣東話與1994年。

九十年代與搖滾

《3rd Rocket 666》這張搖滾專輯，構思源自Tyson不想再做相近的音樂風格，「唔想咁悶」；除了九十至千禧年代的港式搖滾，他以前常聽的Simple Plan、Avril Lavigne、Sum 41，也成了這張專輯的重要養分。

至於最近引起很大迴響的〈1994〉，是繼〈Growing Up〉、〈Better〉、〈i don't smoke & i don't drink〉後，Tyson的第四首的廣東歌作品，亦是廣東話入詞比例最高的一首。Tyson坦言，既然香港地人人都寫廣東歌，那他自己寫的廣東歌就必定要是特別的，例如〈Better〉刻意抽走副歌部分，〈i don't smoke & i don't drink〉則帶實驗性質地把中英歌詞打散，平均分布在整首歌曲（歌曲甚至因而被派到電台的外語榜）。總之，每次做廣東歌，Tyson都猶如勇闖一個關卡；而這次男子氣概大爆發的〈1994〉，則是執意致敬九十年代，且帶有濃厚Beyond影子的一首創作。

「嗰個年代嘅戲係入血㗎，我記得嗰陣去英國讀書，有一個hard disk，裡面全部係古惑仔、周星馳、極速傳說、《旺角卡門》、龍咁威。呢一類型嘅戲，就係喺我有時掛住屋企嘅時候，慰藉到我homesick嘅嘢。」Tyson補充，正因當時歌影視三圈緊緊扣連，密不可分，故Beyond的音樂亦於不知不覺間，對他產生極為深厚的影響：「Beyond絕對影響我好深，深到我寫呢首歌先發現原來有咁深⋯⋯點解我一寫呢啲旋律就咁快、咁上手呢？就係話你知呢啲嘢係入血，只係你冇挖佢出嚟。」

在圍繞〈1994〉的眾多宣傳或討論當中，出現得最多的形容詞也許是「佬味」一詞，那到底Tyson心中的「佬味」是怎樣的？

「希望出到嚟係可以保護人，而唔係需要被保護。呢樣係最核心嘅。」Tyson補充，也許有人會認為這樣的想法有點父權，但他卻不是從這思考角度出發；皆因他覺得只要是自己重視的人，那無關性別，他都想裝備好自身，以隨時去關心及守護身邊的夥伴。

〈1994〉除了是一首佬味很重，很適合Tyson深夜飛馳時播放的歌，同時亦是誠實紀錄三十歲的他，選擇如何與世界相處的歌。Tyson認為，從前受到挫折，可以隨時跑去跟母親或朋友抱怨，可是轉眼三十，便有種儘管在外受了傷，也要對自己說「又唔係第一次遇到」，要儘快收拾心情，繼續抬起頭來向前走的感覺：「OK，唔緊要，我係受傷，但日子都係要過，唔諗太多。」

不再僅僅為啖氣

當初的〈Christy〉，數據有，流量有，但沒有理所當然地帶給Tyson巨大的名氣，就如他笑著所言：「喺條街都冇人識你。」現在回望這段往事，Tyson慶幸自己沒有因而迷失在這場「數據」遊戲裡，反倒更腳踏實地做好音樂：「之後創作就冇一直諗住要贏自己最勁嗰首，某程度上係接受咗〈Christy〉可能就係我最多人聽嘅歌，可能唔會有嘢超越到佢；但你都要繼續做，鍾意音樂就繼續做⋯⋯你做音樂就係做音樂，唔係去追數據。」

身為地下出身的音樂人，Tyson直言前兩張專輯的他，總是帶著地下歌手的自覺——就是不做主流音樂，甚至藐視主流。可是隨著經歷與成長，心態慢慢轉換，Tyson現在反倒「咩都做」，但更講求當中一定要帶有他的獨特風格或趣味：「以前好多嘢嘅出發點都係為啖氣，但而家係為咗件事，想做好一件事⋯⋯而家內心會諗，我受夠你哋覺得我唔得，主流嘢吖嘛，一做，勁過晒你哋（笑）！」現在的他認為，假如你是一個有才華的人，不論是地下或主流，你都一定會做得到，而且做得好。真正強大的人是做什麼也可以。

Tyson平日予人的感覺一向既真性情又直率，但其實他是個相當自省的人，就像年初推出的「南、北半球」滑鼠墊商品，幽默的背後也是經過一番思量：「滑鼠墊會唔會好cheap，影響品牌形象？定係我嘅樂迷會理解到我嘅humor呢？時間無多，諗好，即刻做。」

身處這個音樂與娛樂圈子，真假說話有時難以辯明，一不留神便會墮進虛榮自滿圈套。面對這個花花世界，Tyson習慣抽身與自己對話；在人人盛讚之時，第一個站出來打醒自己：「我成日以第三身去同自己傾偈，因為我怕有盲點。有時喺呢個圈，身邊嘅人永遠讚你好勁呀好叻呀點點點，我永遠就係第一個喺腦入面衝出嚟：『收皮啦！廢呀你！渣！可以再好啲！』因為我驚有盲點，一有盲點，一自滿，就出事㗎啦⋯⋯我會用我而家僅餘嘅IQ，去諗將會發生嘅事，有時都要risk taking：『喂，驚咩啫？俾人鬧咋嘛，受得起。』好想做嘅話，計啱條數就去做。」

愛情是創作起點 也是照亮心房的光

初初因著〈To My Queen〉展開音樂旅程，再以〈Christy〉這首大熱歌曲得到不少聽眾青睞，Tyson直言愛情是他的創作起點：「好多人學一件事都係為溝女，我寫歌都不外乎係為咗溝女⋯⋯溝女係推動人類向前嘅一切（笑）。」Tyson寫歌的初衷也許是為溝女，寫著寫著，卻在音樂世界得到許多意想不到的「甜頭」，隨後便決定認真看待這件事，一路前行。

寫過很多情歌的Tyson自認在音樂以外，實在是位不浪漫伴侶：「佢（Christy）要開口講佢要咩啲，我先會講OK，收到Sir。我係『你唔講我點知啫』嗰種，比較唔浪漫，但我寫歌嘅時候就會好肉麻。」

寫下〈To My Queen〉後，轉眼六年，Tyson在巡迴演出時向Christy求婚，唱了〈would you be mine?〉這首歌，歌詞滿載他們二人真實的生活點滴，溫馨又甜蜜。對於這份愛情，Tyson認為是如同家人般的存在；只要知道她身處家中，哪怕是各有各忙，但還是感覺安心：「愛情係中和我嘅暴戾同憤怒。返到屋企，對住我未婚妻同貓，呢個家嘅感覺，令我將平時事事睇唔過眼、好有意見、好忟憎嗰一面，全部擺喺門口出面。」對於人類世界，Tyson直言時常為其感到失望，可是愛情使他知道世界上仍舊有光，仍舊有供他自在唞氣的一個「家」。

提起對當代愛情的看法，Tyson沉思良久後笑著說：「唔知喎⋯⋯呢啲好青春㗎。」他認為若要把自身價值觀加諸在更年輕一代之上，未免顯得過於「老餅」；與其說東道西，倒不如簡單一句「你喜啦」，鼓勵大家尋找自己需要的關係或愛情模樣。可是隔了一會，Tyson還是認真地說了一番話：「我覺得點都好，奉勸一句，唔好輕易玩感情，因為係會出事，嚴重起上嚟可能係性命或者人哋嘅精神狀況，係可大可小⋯⋯所以將心比己，進入一個人嘅生命，同埋決定離開嗰個人，都要諗好先做，唔好一時衝動。」

▼Follow 18/22
Instagram: https://www.instagram.com/1822hk/
Website: https://www.18-22.com.hk/
YouTube: https://www.youtube.com/@1822hk