《足球女將》熱血感動兼備　近年最精彩嘅真人show

一連十五集嘅《足球女將》喺一片好評下完滿落幕，熱血感動兼備，絕對稱得上係近年最精彩嘅真人show！

「隨各自進化漸有了不安的變卦 城市內散播著各種聲音不像話」

依班女仔由起初不被睇好，從零開始接受依個巨大挑戰。開初連跑兩步都無氣，控個波又唔掂，慢慢踢得有板有眼，一步步以行動證明佢地唔係玩玩下。觀眾睇住各位球技進步，心態意志成長，實在非常感動。

「難忘舊日你我 合力拼湊 成軍的一幅畫」

真人show珍貴之處，在於所有戲劇化情節都係真實發生，無法預料。唔似有劇本嘅運動劇，過程唔會一帆風順，定有高低起跌，踢完一場好波第二場又會打回原形。雖然會氣餒，但不變嘅係佢地嘅堅持，無跟拍依然花盡私人時間練習，默默努力，值得佩服。

「約定最終不管走得多遠未會鬆開手離群 沿途是你 來為我 遮風當樹蔭」

就算每個人背景唔同，但上到場就係一個拼盡全力嘅球員，團結一致，只為勝利而奮鬥，為求進步揮灑汗水淚水。

當中Chloe同郭思兩位最令我深刻，佢地都係藝人出身，無運動底子，只有滿腔熱誠。就算球技仲係唔太成熟，但喺場上積極嘅態度已經對球隊有所貢獻，值得大家嘅掌聲。

盡力付出未必有所想嘅收獲，不過唔付出就一定咩都無。

「在提醒 掌聲背後的初心未泯 洪流暴烈也要在頂峰把手 留一打掌印」

另外，當唔少人認為依個節目係睇女仔為主，點知網上嘅即時討論更多圍繞技術同佈陣，相當有趣，足以證明佢地比到觀眾一種專業嘅感覺。

而比賽雖然遠唔及男子足球嘅節奏同對抗性，但我依然覺得非常精彩，每次友誼賽都睇到好肉緊，特別係入第一球個陣，熱血到我喺電視前尖叫！

到決賽終於完整地睇曬成場波，即使有明顯實力差距，但佢地全力以赴嘅精神令人動容。依班女仔已經真正成為一個足球員，比大家睇到只要願意努力，係可以將不可能變成可能。

「接力賽 要共你 衛冕冠軍 盡全力 台上留下雙雙腳印 再觸發地震」

用十五集嚟睇佢地半年嘅經歷，係完全唔夠喉。剪接亦有啲位做得唔夠好，忽略咗部分成員，希望之後可以放返多啲無剪嘅畫面出嚟。

再者，可能估唔到節目咁受歡迎，決賽無喺賣飛嘅大場踢尚算合理。重點係竟然得IG直播，就算攝影師已經非常專業，但觀影體驗都係好麻麻，仲要係突發，要兩星期後先睇得返完整版，真係最大敗筆。

「憑打不死口吻 營火不會降温 難澆熄的掌印」

不過，《足球女將》整體而言肯定係一套出色嘅真人show，相當難能可貴，期望螢花女足可以keep到落去！

▼Follow hkpopculturelover
Instagram: https://www.instagram.com/hkpopculturelover/