葉蒨文揭結婚29年不生育之謎　稱媽媽轉世成繼孫女錫到燶

查小欣開新YouTube頻道「紅查館」訪問多位圈中好友，近日請來多年恩愛夫婦林子祥（阿Lam）及葉蒨文（Sally）受訪，破天荒詳談相處細節，被問到結婚多年卻不曾生育的原因，葉蒨文亦大方表示：「我唔鍾意細蚊仔㗎。」

現年77歲的林子祥與63歲的葉蒨文結婚29年，雖然二人一直未有生育，不過葉蒨文將繼子林德信及繼女林德懿視為己出，訪問當日更帶同孫女到現場，片段中不時出現小朋友談笑聲，場面溫馨。林子祥提到細女林德懿亦育有三子一女，目前共有五個孫仔孫女，可謂兒孫滿堂，葉蒨文則表示希望可以有機會多照顧乖孫，當被問到為何多年未生育，她卻自爆「唔鍾意細蚊仔」，愛錫孫女的原因是覺得媽媽輪迴轉生成為林德信的女兒。

葉蒨文解釋：「我媽咪走嗰陣時，我喺度諗，唔知佢會唔會返嚟搵我呢，到佢哋 （林德信夫婦）話pregnant（懷孕）嗰時嚇我一跳。我覺得會三月生出嚟，因為三月十五係我媽咪生日，後尾早咗三月十一係我爸爸生日，又屬龍同我爸爸一樣。同埋佢（孫女）係特別鍾意我，佢好細嗰陣時，仲係個幾兩個月嘅時候，咩都唔識講，入到我間房見到我媽咪爸爸嘅相，就指住講『媽媽』，唔知係咪媽咪嗲哋混合咗。」葉蒨文一邊受訪一邊與鏡頭外的孫女互動，又稱日日想念孫女。

除了嫲孫感情，葉蒨文又大爆林子祥生活習慣，搞笑稱老公不愛飲嘢又不愛屙尿，查小欣則揭林子祥曾透露葉蒨文不愛沖廁，葉蒨文直認為了慳水會儲幾次才沖廁，一旁的林子祥亦笑住嘆氣，夫妻互動相當有趣。