江若琳舉行粉絲專屬場　Chill住還清歌債

歌手江若琳（Elanne）近日在社交網分享Fans Club活動情況，雖然只是「自己友」共聚，但規模媲美迷你音樂會。見逼滿粉絲的露天場地除有舞台外，有5位Live Band樂手參與演出，她更由天光唱到天黑，最貼心是設有小食亭，無懼睇騷時會肚餓，粉絲有歌聽、有得玩又有得食，兼可飽覽宜人的西貢景色，可謂一次過多重享受。

Elanne接受訪問時表示每年都會舉行歌迷聚會，但去年舉行完個人演唱會後，有粉絲就「投訴」：「話我喺騷上，有好多佢哋鍾意嘅歌都冇唱到，就提議不如喺Fans Club聚會上補唱番畀佢哋聽，所以就有呢個歌迷專屬場音樂會嘅出現。」

她又感動粉絲為聚會花盡心思，知道她家在西貢，就在附近物色理想場地，尤其露天場是她最大驚喜：「喺呢度開騷，感覺真係好Chill，我啱啱出咗新歌，有好多贊助商支持，可以提供美食畀我哋。」又指看見不少由細跟隨到她大的熟悉面孔時，內心就特別感動，又說：「佢哋帶埋屋企人嚟，有啲真係支持咗我20年，呢次聚會簡直係顛覆咗我對Fans Meet嘅新高度，希望嗰日佢哋同我一樣，可以有個美好嘅回憶啦。」

東網網站 : https://on.cc/東網Facebook專頁 : https://www.facebook.com/onccnews/