《不赦之罪》影評　關於寬恕和矛盾的電影

《不赦之罪》係一部關於寬恕，帶出眾多內心矛盾與反思嘅電影，提供咗非常特別嘅觀影體驗，好值得入場感受！

（以下有劇透）

「如若有日 拭乾眼淚 如願可再天國 相聚」

故事主軸圍繞角色嘅心理變化，當中以梁牧師嘅矛盾最為強烈。牧師同父親兩個身份不斷交戰，一面係自己根深蒂固嘅信仰，一面係自己親愛嘅女兒，喺道德枷鎖同各種情緒之間苦苦掙扎。

後來當得知事件全貌，阿樂為女兒加添罪名時，更加難以接受。最終父親嘅感性與自責蓋過牧師嘅理性，崩潰地報復，成件事喺教堂發生係非常震撼。

「憑舊約換來掛念 留下快樂和笑臉 願以新約在天國再重演」

去到老婆角度，佢無沉重嘅道德包袱，可以不留情面地憎恨阿樂依個罪人。同時又解唔開老公對信仰太固執，而間接害死女兒嘅心結。直到老公對阿樂下毒手，彼此先產生返一份連結，無奈卻已無法改變。

「漆黑中 等明天 入夢時 見昨天」

而阿樂由開初內疚無助，逐漸發現自己嘅價值，對人生重燃一點希望。其實佢本性唔壞，就算犯下彌天大罪，但亦算係一位受害者，好似未至於咁罪無可恕。佢已經為自己嘅罪名負責，接受咗社會嘅懲罰，甚至需要一直背負無形嘅十字架。

喺觀影過程中，我一直諗，究竟阿樂值唔值得被原諒？由前段反覆思考宗教同人性嘅衝突，到後段慢慢對阿樂產生憐憫之心，代入感超強。相信每位觀眾最終嘅答案都會有所不同。

我特別喜歡故事最後，阿樂同晴晴媽媽嘅對話。發生咗嘅事永遠唔會改變，我地或者無法完全寬恕一個令自己受傷嘅人，但能夠放下些少怨恨，某程度上已經係一種和解。

「風中的花 捉不緊嗎 永遠記住 最美剎那」

電影拍出嘅情況可能有點極端，但其實適用於每個人身上。當面對傷害你嘅人，如果佢真誠悔改，你又會唔會考慮放下執念？依個問題值得深思。

「深愛後 換來一句 節哀 誰道這是慈愛」

秋生同蘇玉華表情同對白演繹都係教科書級，充分感受到角色嘅悲傷與無助；George嘅表現更令人眼前一亮，瘦削嘅身型配上頹廢嘅造型，完美地演出阿樂落寞內疚嘅感覺，再次證明佢係一位有潛力嘅演員。

「風中的她 相擁好嗎 永遠記住 最美剎那」

角色描寫以外，兩位新導演拍攝手法成熟，用咗唔少長鏡頭，令觀眾完全陷入故事嘅壓抑沉重。能夠以九十分鐘唔到嘅時間，拍出一個咁完整嘅故事，實在令人驚喜。當然如果角色動機同衝突再描述得深入啲會更好，但以第一次執導嚟講絕對係非常出色。

「疼愛過 會再見吧 追憶一生 甘心嗎 愛要痛著 念掛」

總括而言，《不赦之罪》係一部不可多得嘅好電影，感謝台前幕後作出如此大膽嘅嘗試，為今年頗為弱勢嘅港產片市場帶嚟一點衝擊。

▼Follow hkpopculturelover
Instagram: https://www.instagram.com/hkpopculturelover/