魯庭暉時隔3年首更新社交網 發文分享離開MakerVille感受
MakerVille出現高層人士變動，行政總裁魯庭暉離職並加盟華納音樂集團，出任亞太區總裁。魯庭暉自2022年MIRROR發生紅館演唱會墜屏事故後，一直未有再更新Ig，直至他離開MakerVille並過檔的新聞傳出後，他今天（8日）才再於Ig發文，感謝舊公司在過去15年的栽培，以及同事、客戶、合作伙伴的支持。
他說︰「細個第一次去外國讀書，同學問我叫咩名，因為我冇好鍾意嘅英文名，而香港嘅朋友都叫我魯暉 。所以我就順口答咗佢哋my name is lofai。跟住畢業，做第一份工，做第二份工，遇到好多上司同事客戶，有香港人有外國人，我都係用呢個名，到咗有一日終於有外國朋友忍唔住同我講你知唔知lofai呢個發音係好似Lofi，一聽個名就諗起Lofi music。咁我就話我都唔知係咩嚟嘅，完全get唔到個point。查一查先… 哦，原來係一種音樂嘅風格。『Lo-fi（Low Fidelity）音樂係一種音樂類型和風格，特徵係故意保留錄音中嘅『瑕疵』，例如背景雜音、模糊嘅音效、簡約嘅旋律，營造出一種懷舊、放鬆、甚至有啲『宅宅』嘅氛圍。』15年。多謝上司，不斷俾唔同機會呢個瑕疵進步。多謝同事、客戶、合作伙伴，冇佢哋嘅努力同支持，所有美好嘅嘢都唔會出現。多謝觀眾聽眾粉絲用戶，俾到一個我同同事努力嘅原因。多謝台前，多謝幕後。講到呢度，我覺得自己好似平時上台嗰啲歌手咁，一輪嘴講一串多謝說話 。我成日喺台下度諗，你哋班友係咪被迫講㗎 。到今日，我得到一個結論：其實多謝嘅說話，點講，都講唔出多謝嘅心情。『多謝公司』呢四個字係代表緊，多謝好多人。呢一班人，叫結伴。『是這些結伴，讓我擁有過豐盛以我沾濕的眼睛，對美好光景致敬』。」
魯庭暉一手捧紅MIRROR、ERROR及COLLAR，也令不少ViuTV藝人廣為人識。大批ViuTV藝人先後留言感謝，包括MIRROR的盧瀚霆、呂爵安、柳應廷、江𤒹生、邱傲然及邱士縉，ERROR成員郭嘉駿（193）、駱振偉、COLLAR成員李芯駖、許軼（Day）及蘇雅琳（Ivy）等。盧瀚霆說︰「『謝謝你』這三個字也不足夠去完全道出謝謝你的心情。感恩、感激有你，魯生。」駱振偉表示︰「感謝了，但願前路有更好更大嘅挑戰。」MIRROR及ERROR經理人黃慧君（花姐）亦留言︰「謝謝魯生。」
（即時娛樂）