Ray Online｜有傳梁君彥指控徐英偉因外遇下台　兩人會見傳媒澄清

公眾人物一舉一動都備受關注，最近有傳立法會主席梁君彥喺傳媒聚會中，提到前民政事務局局長徐英偉係因為有婚外情而落台，兩個當事人今日一齊見傳媒澄清。

梁君彥解釋當日嘅傳媒聚會主要係解釋新嘅議員履職機制，傳媒列舉好多例子，問唔同情景會唔會被禠奪議員資格。梁君彥強調記憶中冇任何指控，有關於講到徐英偉嘅事，佢話記憶中嘅評價係正面，既然有誤會，今日就一齊見記者，同大家講冇事。梁君彥話希望唔會因為呢件事有影響，立法會仲有好多正經事要做。問到今次算唔算係和頭酒，梁君彥話「冇酒喺度」。

被問到聽到呢個消息有咩反應，徐英偉話「見慣大場面，有咩反應？」，而當日唔在場好難評論其他嘢，對佢嚟講就好簡單，做自己嘢，強調自己絕對冇婚外情。佢冇正面回應有冇向梁君彥出律師信，如果可以大事化小、小事化無係最實在嘅做法，希望唔好畀人分化，而係畀大家睇到建制派好團結。

指兩人關係好

梁君彥話兩人關係不嬲好，識咗十幾年，一直覺得對方好有誠信、勤力、操守好。徐英偉當年因為疫情期間出席宴會落台，梁君彥話對方當日離開政府係體現問責，顧全大局。徐英偉而家擔任酒店業主聯會執行總幹事，梁君彥話對方身居要職，唔只香港重視旅遊發展，國家都好重視。

原文刊登於 AM730

睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)