方力申自爆求婚連環蝦碌細節　「父母很支持愛錫Maple」

方力申於今年情人節（2月14號）宣布已跟拍拖兩年的葉萱（Maple）結婚，再於4個月後的父親節（6月15號）自揭將做爸爸。小方日前接受查小欣YouTube 頻道「紅查館」專訪，首度公開求婚與結婚當天一氣呵成、既浪漫又驚險的難忘回憶，更罕談父母對Maple捲入邪教事件的接受與包容。

新婚大半年，小方在專訪中談及遲婚理由：「公眾覺得做藝人梗係五光十色，個個都貪玩，所以大家都唔肯結婚，其實我覺得藝人好單純，所有嘢都係公司幫你安排好，好受保護，同埋因為我哋冇返工、冇朋輩，你升職、你結婚，冇大家一齊成長嘅感覺，所以普遍嚟講會遲婚啲。」年過四十，與Maple又相處愉快，加上希望父母享兒孫福，忽然一個機會出現，小方立即好好把握：「咁啱我要去拉斯維加斯做活動，好方便（註冊結婚），阿媽就話不如結埋婚，咁就開始去組織，有個好好嘅朋友幫我預訂一系列嘅嘢，租咗架飛機掛住『Will You Marry Me』，大家以為好貴，但其實只係5位數字，搞生日都建議你玩吓！」

當萬事俱備時，期間卻發生連串蝦碌，小方笑着憶述：「第一個笑話，飛機比原定遲咗45分鐘先嚟，我一路喺海灘拖延時間，結果捱到飛機嚟，我就求婚啦，換衫嘅時候，證婚人嚟咗再多個驚喜，簽埋紙，求婚加結婚一次過進行！」求婚最緊要驚喜，小方卻險被媽媽穿煲：「太太（Maple）臨時臨急話唔去拉斯維加斯，我阿媽就打開口牌：『你去啦，佢（小方）可能會同你求婚！』跟住太太問我，我話冇可能，一定唔會！當離開拉斯維加斯，佢就覺得唔會，因為大家以為拉斯維加斯最容易結婚，但原來洛杉磯都得。佢以為冇咗呢件事，去到真係求婚嗰一刻，佢都愕然，再結婚簽紙就更加愕然！」結婚當日，小方所穿的粉紅色西裝，是去年到英國觀看溫布頓男單決賽與湯告魯斯合照同一套，至於Maple那襲漂亮婚紗，小方不禁讚自己：「我都幾叻，我太太嗰兩套婚紗，都係我目測上網訂，我太太係模特兒身形，一着就fit ！」

除了外在條件，Maple的內在美亦令小方感覺與眾不同：「我覺得佢好唔同，之前去歐洲旅行，返嚟乜都冇買過，佢唔係好需要呢啲，食嘢又係好貼地，同我一樣生活比較簡單，當然佢天真樂觀嘅性格，都係好吸引我。」之前Maple捲入邪教事件勇敢發聲，小方坦言拍拖一段日子後才跟父母交代：「我媽咪好支持佢，可能佢哋都係白羊座，敢愛敢恨，覺得做得啱，需要發聲就應該講，當時嘅畫面我都有拍低，媽咪攬住女朋友話：『無論你將來同我個仔得定係唔得，我都當你係我個女！』我聽到媽咪咁錫自己嘅女朋友，第一係如釋重負，第二覺得好窩心！我老竇都係非常愛佢，譬如一家人食飯，我問阿爸想食乜嘢，佢話：『你唔好問我，你問Maple食乜嘢！』我哋嘅關係好融洽，而家結咗婚，暫時都係同我爹哋媽咪一齊住！」