林日曦明年回港主演舞台劇《大反枱日》　聯手梁祖堯反枱反櫈反埋蓆

近年移居日本的林日曦，日前宣布推出年度癲喪喜劇《大反枱日》，更邀得「舞台劇帝」梁祖堯（阿祖）參演，二人首次合作即反枱反櫈反埋蓆，誓要於香港演藝學院歌劇院反出巨型舞台劇，舉行一連21場演出！

林日曦前年曾於日本參加世界反枱大賽，當時飲恨只得「梗頸四」，但反而激發創作靈感，助他寫起《大反枱日》的劇本，他笑指：「喺日本參加完世界反枱大賽之後萌生呢個念頭，雖然我只係攞到第四名，畀三個日本人贏咗，不過佢哋只係個記錄遠過我，但係氣勢麻麻哋。我覺得香港人先係全世界最適合反枱嘅人，隨街都見到啲人鬧交反面，大家都好好火。」至於今次為何「挑機」邀請梁祖堯？林日曦語帶調侃：「因為覺得佢紅，想叨佢光，同埋偷佢fans……」

對於怎樣評價是次反枱對手，梁祖堯則直言，幾乎所有林日曦的作品都睇過，無論是「大XX日」系列還是Talk Show，其中尤以《林日曦細聲講悲但真》最令他難忘。他興奮表示：「一直都好想同佢合作，唔係客套說話，係真心嘅。人生去到呢個階段，好想同多啲自己欣賞嘅人合作，睇下擦到啲咩火花出嚟，又可以刺激創作，開闊眼界，所以收到邀請嗰刻，真係好驚喜，好開心！」阿祖盛讚林日曦的筆觸獨特，由他設計的笑位絕非一般笑位。他笑說：「佢成日話自己內向、怕羞又有反社會人格，但其實佢內心同講出嚟嘅嘢都係一個暖男，會溶化你，呢個反差好有趣。」

雖然初次合作，但阿祖已從白只、韋羅莎、胡麗英等好友口中聽過不少林日曦的事跡：「佢哋成日話佢要求高，但同時不停強調佢其實係冇嘢嘅，係好人嚟，唔好驚佢，反而搞到我有少少淆底——因為當身邊朋友好大力咁講佢係好人，我就會諗，如果真係好人，其實大家唔使咁用力解釋，好似有啲暗湧，所以開頭我都驚驚哋。」阿祖坦言會以觀望態度迎接排練，希望先把自己本分做好：「其實真正嘅我都好怕羞、被動（雖然講都冇人信），咁所以同林日曦合作，我可以舒服啲，唔使太用力、太主動，由佢順其自然慢慢發生。」

阿祖亦分享了早前到日本拍攝時的一段趣事。當時他與胡麗英及監製三人同行，帶同大量道具上機，包括大量假金鏈、金牌以及一些仿真的食物。雖然金器全屬「假貨」，但因為始終是金屬，重量不輕，三人只好分別放在手提行李上機。最搞笑的是，當填寫入境申報表時，監製疑惑著是否需要申報「攜帶黃金」。阿祖笑著憶述：「當時引申出另一個擔憂：我哋會唔會被誤會帶住啲假金器入境日本作非法用途呢？萬一所有道具被扣查，咁就拍唔成，都唔知點算……」幸好最後只是虛驚一場。

談到劇目特色，阿祖形容《大反枱日》特別適合全香港人，尤其是身心受壓抑的一群：「其實我都好想反枱，但現實唔係下下都可以話反就反，但係喺呢部舞台劇入面，就可以將你反台嘅慾望完全發揮到極致，話反就反，尤其是林日曦係個反枱專家同反枱運動員，反枱嘅情節係會喺戲裡面不停持續地出現，所以特別適合身心受到壓抑嘅觀眾朋友入場觀賞，等我哋幫你反枱紓壓。」