《弊傢伙！我要去祓魔》結合鬼怪玄學元素 配日漫風格有新鮮感

歷時二十集嘅《弊傢伙！我要去祓魔》上星期正式完結，題材同風格都係香港劇集少有，精彩又驚喜，令我忍唔住不斷追看！
（以下有劇透）

故事建構出一個全新世界觀，結合鬼怪玄學元素，配上日式動漫嘅拍攝風格，相當有新鮮感。主線支線同樣引人入勝，充滿各樣情感，亦有唔少意想不到嘅轉折。

觀眾同三位主角一齊拯救安平市，雖然招式有啲中二病，但確實幾得意，有以前睇日本超人嘅感覺。反派仲要完全唔弱，全程智商在線，令彼此對決更精彩。當以為天狗係final boss，點知一個反轉，盡顯人性卑劣，原來人比鬼更可怕。

雖然唔少情節看似荒謬，但又會見到現實社會嘅影子。每個人都可以保護自己家園，五大守則同贖靈曲我地依然記得。

而劇集中眾多角色都有完整故事線，塑造立體，從過去經歷就了解到佢地行為背後嘅原因，即使係小角色同樣投入到，亦令結局更催淚。

零零起初比人感覺冷漠奇怪，逐漸被兩位同伴打開內心，可惜最終不幸犧牲，但能夠一家團聚我諗算係另一種大團圓結局；路嘉敏就平易近人，同唔同角色嘅化學作用都非常有趣。

依兩個看似平凡但暗藏絕技嘅女仔，為大家帶嚟一份純粹嘅情，佢地互動實在太溫暖，能成為密友大概總帶著愛。兩位終於有一個令人深刻嘅角色，希望未來有多啲演出機會！

毛無邪由曾經意氣風發到頹廢折墮，最後甘願捨己為人，不過天意要佢留低，反而選擇帶走零零，或者就係對佢最大嘅報應。強尼將整個角色轉變演得深刻動人，果然係全能藝人。

一眾配角選角非常合適。我特別鐘意阿Will同吳肇軒，一個忠一個奸，一個看似鐵漢實質柔情，一個看似奸險實質軟弱，再次證明兩位咩角色都carry到。

無可否認，可能礙於預算，依部劇嘅CG真係麻麻，故事收尾亦比較趕急，有唔少線無好好收返，如果多幾集相信會更完整。雖然有啲美中不足，但故事其他方面都非常出色，絕對稱得上係一部優秀作品。

最後，感謝導演願意作出咁有創意嘅嘗試，為港劇帶嚟一點新元素！

▼Follow hkpopculturelover
Instagram: https://www.instagram.com/hkpopculturelover/