專訪｜同志配偶申公屋終極勝訴 奔波6年不再符資格 Nick：願成就他人
去年 11 月，終院裁定公屋政策排除海外已婚同志屬違憲，一直低調爭取的 Nick 獲判終極勝訴，首度站在終院門前被圍訪，「嗰朝都未諗到⾃⼰可以講咩，傻更更咁上 ChatGPT 問有咩可以講⋯⋯」
年少時「出櫃」碰壁，促使 Nick 當上社工，希望幫助同路人；長大後決定與伴侶簽紙結婚，除了考慮與對方關係穩定，更大原因是看到不公，盼有身位為同志社群爭取。
「有啲同志朋友，識咗 partner（伴侶）但要喺公屋屈蛇住㗎喎，咁都唔係辦法喎，點算呢？」司法覆核往往花上數年時間，過程中可能要公開私生活，令很多人卻步，「冇人去做我就去做囉」。
2018 年入稟時仍是社工系學生，如今已成為全職社工，入息不再符合公屋申請資格。他則認為，成就他人，仍然值得。「幻想將來有同志 couple（情侶）喺埋一齊，有個溫馨窩⋯⋯我好想去做個支撐嘅部分。」
終院頒下裁決那天早上，Nick Infinger 通宵工作後趕至法院。在庭內等了約 10 分鐘，書記派發判詞，Nick 速讀數分鐘，知道自己勝訴後，法庭職員便驅趕庭內人士離開。
「嗰刻我淨係覺得好強烈嘅開心，終於都贏到喇⋯⋯都未諗到自己可以講咩，傻更更咁上 ChatGPT 問有咩可以講⋯⋯ChatGPT 話著重制度不公。諗返都係，我想個制度改返正先做咁多嘢，出去講兩句啦。」
受到 AI 的啟發，一向低調的他硬著頭皮步出法院，被數十名記者圍著訪問。他先感謝伴侶及法律團隊一路相伴，形容裁決可算是「有少少成果、畀自己一個交代」，亦感嘆未來毋須再記掛著「要去為人哋、為香港做咩宏大事情」。
Nick 當天受訪期間全程靦腆微笑，最後不忘展示一早準備好的彩虹旗。
忙了大半天，Nick 回到家中，鬆了一口氣，「估唔到自己笑得出」，同時心情複雜，內心有點空虛。6 年來以素人身分，背負一宗司法覆核案，壓力可想而知，但案件無形中亦成為了他的精神寄託。
「單官司好似好有意義，到依一刻完喇喎，之後可以點呢？」
同運與人生
由選科、工作、結婚、到打官司，Nick 不少人生決定都與同志運動緊緊扣連。願意挑起司法覆核的擔子，一切源於 Nick 15 歲的經歷。
Nick 自小五發現自己喜歡男生，中三時透過互聯網認識圈內人，接觸到同志組織「香港彩虹」。當時「香港彩虹」會址在佐敦一棟大廈，是香港首個同志社區中心。15 歲的 Nick 在此遇到同路人，找到避風港。
「出面世界一係扮直，就算勇敢 come out（出櫃）咗，人哋搵自己嚟講笑都要扮冇嘢，去到嗰度好唔同，好自在，可以做自己。」
他後來當上組織義工，協助籌備首屆同志遊行、世界不再恐同日。過程中接觸到不少「深櫃」同志，聽到他們的分享，「佢哋上到嚟講收埋自己好慘，我唔想做嗰啲⋯⋯」
「後生吖嘛，梗係勇㗎啦，我真係唔想收埋一世。」
Nick 是家中長子，有兩個妹妹，他決定先向母親剖白。他特意選了「香港彩虹」休館的日子，預想如母親願意了解，便帶她上中心參觀。結果，當 Nick 母親聽到兒子說「自己鍾意男仔」，「佢好激動喊晒⋯⋯話群埋班人教壞你，邊個教壞你」，又哭著說「你未諗清楚啫，你咁搞法，我點樣面對親戚朋友呀？好唔乾淨，會唔會惹晒啲病返嚟呀？」
勇字當頭的 Nick 出師不利，自此不再在父母面前談及感情事，與家人的關係亦變得疏離。
Nick 年滿 18 歲後，把原有名字改為 Nick Infinger，沒有通知家人，「（名字）冇乜意思，求其上網碌⋯⋯太憎呢個屋企，太想脫離一切」。搬家後，Nick 每月回來探望家人一至兩次，母親偶爾問起近況，Nick 要不輕輕避過，要不就敷衍回應，結婚也沒提起，免起衝突。
他之後繼續投入「香港彩虹」活動，當時組織沒有社工，考慮到社工或更有能力倡議平權，創辦人張錦雄亦選擇修讀社工，耳濡目染，Nick 亦踏上社工路。
「家」的意義
終院判詞提到，現行公屋政策，剝奪了有住屋困難的同性配偶在同一屋簷下生活的權利。Nick 與丈夫 Ken 的經歷，正正讓他感受到安樂窩的重要。
Nick 透過圈內朋友認識丈夫 Ken，拍拖兩個月後，對方便要到日本留學。倆口子透過 Skype 維繫感情，期間 Nick 到過日本探望 Ken，窩居於小套房，早上各自出門，晚上結伴回家，一同生活。
忽然同居，令 Nick 開始感受到「家」的重要性，「如果繼續有自己嘅竇，日頭各自出門有自己嘢做，夜晚返嚟好溫馨喎」。後來 Ken 從日本回港，在 Ken 的親戚幫助下，二人於 2016 年以較相宜的租金租住屯門一單位，正式展開同居生活。
二人落力布置、組裝傢俬，初時連同 Ken 胞妹夫婦共 4 人同住該單位，Ken 胞妹與妹夫後來遷出，倆口子終可享受二人世界，閒時「煮飯仔」。從前 Ken 最愛 Nick 為他煎班㦸，但因單位開始殘舊，天花剝落、廚房滲水，暫時無法煮食，只能叫外賣。縱使如此，單位仍是二人的安樂窩，「返到嚟可以放低心防，有個大家一齊嘅空間」。
Nick 任職社工，須輪班工作；Ken 則一般「打工仔」上班時間，二人幾乎沒有時間拍拖，只能把握周末一起做瑜伽、吃壽司。同居對兩人而言，顯得分外重要，「好彩有呢間屋，如果一齊住嘅空間都冇，本身我又返 shift（輪班制），就真係冇機會見」。
Nick 最喜歡客廳中的梳化，「最珍惜、最鍾意唔係話大家做啲乜嘢，而係大家攤喺張梳化，佢有佢玩手機，我有我睇自己啲嘢。大家挨埋側邊，就係呢個安全感囉。」
家中當眼處擺放著不少毛公仔，大部分是二人旅行的戰利品。睡房放著的巨型 Baymax 公仔，是他們在旺角拍拖時在路邊看見的，Ken 很喜歡，Nick 便拾回家清洗。
梳化亦長期擺放兩個公仔，讓倆口子透過公仔傳情。如果相處融洽，會把兩隻公仔依偎地放好；如當日吵架，公仔會背對背而坐，Nick 笑言「返到嚟見到公仔唔同狀態，都幾正嘅」。
前人種樹
兩人同居後，Nick 在同志組織中得悉有同志配偶在海外註冊後，卻要在公屋「屈蛇」，無法名正言順申請同住，「咁都唔係辦法喎，點算呢？」
司法覆核是可行方法之一，但先決條件是有人願意承擔，「就算用化名唔拋頭露面，都要搞咁多年官司冇人肯䎺喎」。Nick 得悉事件，反覆考慮後決定接手。
他說，參與同運多年，「好似你搞幾多遊行，做幾多邊皮嘢都推動唔到（平權），淨返用法庭 JR（司法覆核）可能比較有效⋯⋯冇人做咪我做囉。」
另一股推動力，是十多年前在他心中埋下種子的「小曹」司法覆核案。
港台節目《鏗鏘集》於 2006 年播放節目「同志．戀人」，被廣管局指違反持平原則，向港台發出「強烈勸喻」。節目中的其中一名受訪者「小曹」曹文傑入稟，質疑廣管局過分限制言論自由，涉性傾向歧視，終獲判勝訴。
「原來俾人踩到上心口，可以用返法律嘅途徑去做。」
Nick 切身感受到，今天看似理所當然的同志權益，例如將男男合法肛交年齡，由 21 歲降至16 歲，與合法性交年齡看齊，都是前人一步一步爭取的成果。Nick 望以身報答，同為後人種樹。
不過，要有資格提出司法覆核，Nick 首先要結婚。
Nick 本來沒有打算結婚，一來他與伴侶已同居，二來不覺得一紙婚書非常重要。但考慮到與 Ken 感情穩定，又有申請司法覆核的實際需要，「掙扎完，都係結啦！所以就好倉促求婚」Nick 笑說。
一天晚上，他與 Ken 在酒吧消遣後，二人略帶醉意，Nick 就向 Ken 求婚，「喺條街，求其一度，我話想結婚，佢話可以呀」。2018 年 1 月，二人赴加拿大結婚。同年 3 月，Nick 入紙申請公屋，約半年後被房署發信拒絕，署方在信中引述牛津字典，指二人不符夫妻定義。Nick 便入稟提出司法覆核。
Nick 曾經想像，如果官司勝訴，獲分配公屋後如何裝修，但最終官司漫長，6 年後 Nick 已成為全職社工，不再符合入息上限。現時屯門單位始終屬於 Ken 的親戚，若業主另有想法收回單位，二人便要遷出這個安樂窩。
奔波 6 年卻無法享受成果，Nick 仍覺值得，「幻想將來有同志 couple（情侶）喺埋一齊，有個溫馨窩、幸福生活⋯⋯我好想去做個支撐嘅部分」。
「我就係唔想之後真係有人狀況好差，迫到埋身先去做，正正因為自己搞咁多年運動，覺得個制度緊要㗎，搞掂個制度，先唔會出問題。」
無形壓力
案件拉鋸 6 年，可謂一波三折。先有政府兩度上訴，Nick 說，這一點早有心理準備，「一開始都知，律師都講無論邊邊贏都預咗上訴，你唔使預咗咁快完。」
意想不到的，是中途要更換律師團隊。 原審時代表他的人權律師韋智達（Michael Vidler），於 2022 年 4 月突然離港，律師行亦隨之關閉。Nick 說，韋智達不只協助他打官司，亦一直在旁鼓勵，從新聞得悉他離港時「好衝擊」，一方面替對方憂心，另一方面自己亦下定決心，司法覆核無論如何都要繼續。
而在訴訟過程中，最令他耿耿於懷的，是來自同志社群的一些批評。
「有人不滿我開頭佔咗個位（提司法覆核）又唔做訪問，收收埋埋，咁難得你又做單案，你應該講下同志狀況、同志有咩困難，有個機會你唔講。」
Nick 慨嘆，外間針對同志的批評，甚至網上不理性的謾罵，他都已經免疫「不痛不癢」，「來自自己社群嘅（意見）先最入心」。他說，起初保持低調、婉拒訪問，因自己當時仍是學生，擔心身分曝光會影響實習及工作機會。直至 2019 年，香港經歷前所未有的衝擊，眼見新聞媒體相繼停運，他開始改變想法。
「之前好似幾時講、點樣講都大把機會⋯⋯（依家）仲有空間講呢啲議題嘅時候，我覺得自己有個責任講，再唔講、後面啲人未必有機會用呢個方式講。」他亦慶幸後來受聘於一間同志友善的機構，猶如一支強心針，於是逐步走進鎂光鏡下，最後於終院外面對各大傳媒。
終被「看見」
縱然願意面對公眾，Nick 卻一直沒與家人談及案件，直至終院裁決兩周後，Nick 回老家探父母。父母從電視新聞得悉兒子近況，主動提起案件，嚷着「搞到咁大單真係好咩？出晒名，咁多犧牲真係好咩？」
Nick 感無奈又心酸，千身萬苦「打勝仗」，回到家中，父母卻不明白，覺得他在案中沒有得益，卻要付出，「份人好笨」。
他嘗試耐心解釋，「呢啲係我想做嘅嘢」。最終父母向他說，「你咁大個人鍾意點就點啦」，又提到從新聞得知 Nick 有穩定關係，感到放心。
自 15 歲出櫃後，Nick 一直與家人避談同志議題，相隔十多年再次觸及，雖然沒有「大團圓結局」式的戲劇性發展，Nick 形容已是父母罕有地展現「一丁點接納」。
「因為以前細個好多反對⋯⋯由十幾歲講完（出櫃），到依家（官司）畫上句號，某程度上係了咗件事。」
而他的案件，不只在香港「被看見」。Nick 分享，他早前到台灣參與同志遊行時，經過有關亞洲各地的同志平權展覽，居然在展板上看到自己的案件，有種隔著海岸，互相照亮的感覺。
「原來自己努力都唔係淨係香港，其他地方都關注緊⋯⋯同志運動可以跨越國界，愛都可以跨越國界。」
制度與改變
隨著官司告一段落，Nick 亦開始思考人生方向，「本身天真諗過做埋呢單收山啦，但好似上完終審，聽到多咗大家支持，原來有人關注，如果都仲有人呼應時，自己諗吓會唔會幫手同志活動」。
投身同運多年，Nick 感受到社會風氣的改變，從十多年前社會似乎不當同志存在，及後同志逐漸被社會看見，「去到現在大家都當冇乜嘢、好平常」。
他說，一切都是一代又一代人累積的成果，上一代人透過法律渠道「切香腸」式爭取，新一代縱使面對社運沉寂，亦末有停下來，例如由以往的籌辦遊行，近年改為設置市集。
Nick 形容，現時同運有如「走鬼式」運動，「遊行唔得咪擺檔」。而他深信，要做到真正互相尊重，公眾教育、政策倡議同等重要。
「有人誤解爭取乜乜平權叫跨過一步，你會唔會拎條法律條文返去同阿媽講，法律咁規定㗎，你對我好啲接納我啦？⋯風氣上大家係咪認識同志係乜，大家可以點互相尊重⋯權利平等咗之後點揀，社會風氣點變，唔使自己諗咁多，交返畀大家。」
記者：WWY
攝影：Nasha Chan
相關報道：
《法庭線》報道全部免費開放，有賴讀者訂閱支持營運：
https://bit.ly/3LJeOzX
追蹤《法庭線》網站及各平台：
https://linktr.ee/thewitnesshk
留言 51