許廷鏗左手重傷裝4口釘　撐欣宜參加《歌手2026》捲土重來

歌手許廷鏗昨晚現身廣東歌慈善演唱會。早前因打波搞到右腳受傷的他，日前因趕時間返牙醫診所，不慎跌落10級樓梯導致左手骨折，故整晚帶着支架敷傷上陣，直言希望其表演觀眾會收貨，幸而他的演出落力兼精彩，即時獲台下觀眾大讚帶動全場氣氛。

許廷鏗受訪時透露當日跌落樓梯時，下意識用手撐着身體，故導致骨折及傷了筋腱，內臟有點瘀傷，現時傷患處裝了4口釘：「都做咗手術一個禮拜，今日終於攞到個咪，尋日都未係好得。（牙醫診所工作點算？）有一日都返咗去，因為有啲病人唔等得，包括我媽媽，要先幫佢哋解決咗問題，而嚟緊我都應該會休息到4月診所先復常。」

一向活躍的他笑言受傷後其實在家休息了兩天：「不過覺得自己好廢，反而出嚟做吓嘢仲好啲。依家都要阿媽先幫我用保鮮紙包住個傷口，自己先沖到涼。」

對於好友鄭欣宜傳出將參加《歌手2026》，他反問記者說：「真係？應該嘅，佢原本都想參加《歌手2025》，今次係捲土重來。（佢冇同你講？）最近少聯絡，不過知佢生活正常，仲畀人影到出街買嘢。（佢冇問候你嘅傷勢？）我諗佢冇乜點睇新聞，我更加唔會話畀佢知，費事嚇親佢。」

東網網站 : https://on.cc/東網Facebook專頁 : https://www.facebook.com/onccnews/