跑步與人：Jean

1. 跑步年資？為什麼開始跑步？

跑步年資約3 年，跑山2 年左右。以前完全唔跑步，只會去下gym、瑜伽同埋踩下單車。因為疫情關係所有健身室關門，開始愈嚟愈肥。有一日就攞住買咗五年都未爛嘅跑鞋（可想言之我着得幾少）去海傍跑下。

2. 有沒有跟跑會或教練跑？選擇原因？

戰神越野– 以前我有兩個跑班，分別係路跑同越野跑，有幾次因為兩班都有高強度訓練，令到舊患走返出嚟，機緣巧合之下，朋友介紹咗戰神越野呢個跑班俾我，有路跑同埋越野課，啱晒我。同學仔喺運動場上對訓練嗰份熱血，戰神對我呢個新同學嘅教導，令我好深刻，就係咁我就加入咗戰神。

3. 喜歡跑山還是路跑？路跑跟山跑有什麼不同感受？

山跑！對我嚟講山跑有好多唔同嘅路況，又睇到好靚嘅風景，就唔會覺得悶。不過教練話跑山要跑得好，路跑一定要好。就係咁今年將會迎來人生第一個初馬，Joe Sir 「真係」冇逼我跑馬拉松🤣 ！

4. 最喜歡的練習場地（原因？）

跑馬地，係最近嘅運動場，而且個圈比較大，感覺上好快就跑完😂。

5. 喜歡什麼時段跑步（晏跑/晚跑）？為什麼？

比較喜歡夜晚跑，因為放咗工跑步會輕鬆啲，時間冇咁趕。

6. 有沒有因為跑步而放棄了其他運動？

有，少咗踩單車，不過花多咗時間做瑜伽拉筋。

7.跑步對人生有沒有幫助/改變？

跑得愈多就發覺自己知道嘅愈少，要更加努力去學習。

8. 有沒有跑步傷患？如何處理？

有，通常都係俾佢多啲休息，不過最緊要嘅係學識點樣強化返受傷位置嘅肌肉，減低傷患。

9. 最深刻的一場賽事？原因？

暫時最深刻嘅一場比賽，應該係2023 年HK100。喺鹹田落斜突然之間想樓梯轉斜路，隻腳俾樓梯同斜路條邊撠到，左腳90 度拗。成個人坐咗喺度完全起唔到身。休息咗一段時間愈嚟愈腫，心諗仲有八十幾公里點搞？就同教練講我準備剪帶，教練就話拗柴咋嘛，你估我未試過咩？嚴重過你嘅都有。選擇繼續定係剪帶只係一線之間。行吓隻腳又鬆返啲，我就扎住隻腳繼續！雖然最後做唔到目標時間，但喺咁嘅環境下，可以比上年時間有進步，真係好開心。

10. 最想到外國哪裏跑比賽？山賽定馬拉松？

希望終有一日可以去Chamonix UTMB 見識吓呢個殿堂級嘅大賽，我希望可以放到假，抽OCC / CCC 玩吓，感受吓現場比賽氣。

11. 現時跑步目標是什麼？

好好準備人生第一次初馬。

12. 最喜歡的跑步用品品牌？最喜歡一對跑鞋？（原因）

暫時而家最喜歡嘅路跑鞋係 Saucony Endorphin Pro 3，山鞋就 Salomon Pulsar。

最後一題，有什麼社交媒體可以找到你？

IG: jean_love_trails

Please follow Insports Hub on Facebook & Instagram
https://insports-hub.com/
FB
https://www.facebook.com/insportshub
IG
https://www.instagram.com/insportshub/