蔡卓妍知市道唔好不能坐以待斃　墊支搞劇本搵投資方

泰星馬里奧毛瑞爾（Mario Maurer）、藝人蔡卓妍（阿Sa)、蔡思韵(Cecilia）和倪晨曦今日（5日）現身品牌活動，阿Sa笑言自己不是來工作，主要是Shopping：「想買聖誕禮物，見到啲絲巾可以繡名，想送畀啲姊妹，仲有睇到啲餐具好靚，都想買番啲。」

阿Sa指品牌商很好，因本月22日是她的牛一，昨晚特別宴請她、馬里奧毛瑞爾以及魏浚笙等食飯：「好開心，同Mario Maurer合作過電影，佢比對上一次見面瘦咗好多。（想唔想再同佢合作？）都有傾過，佢問我香港開戲多唔多，我話香港依家開戲好少，佢話泰國都一樣，原來好多地方都面對電影市道唔太好嘅情況，我對上一次拍戲已經係賀歲片，暫時都未有新戲開，嚟緊會有啲客串。」

阿Sa明白現在做演員不能「齋等」，故決定着手搞劇本：「我自己埋緊班底搵人寫劇本，以前市道好，好快會有劇本，好快成事，依家市道唔好，要做多啲嘢。（會唔會參與劇本創作？）我係廢，有時諗到啲嘢，都會同編導交流下。（會唔會投資埋？）搞咗劇本先，再睇有冇投資方，不過，叫人寫劇本都要墊支咗先，唔能夠唔畀人工叫人白做，依家有兩個故事搞緊，故事內容亦無限制，點都得！（出年開拍？）要睇劇本，主要唔想停落嚟。」

阿Sa本月22日牛一，她笑言生日飯由上個月底已開始食，還指跟C君是同月同日生日，說了多年一齊搞生日派對，今年應該成事，現已切了３個蛋糕，應該有排切，自己人緣向來不錯，冇擔心冇人同自己慶祝。

談到送絲巾禮物給姊妹們，問阿Sa可有心愛的人要送禮物，她笑得相當燦爛，並謂：「遲啲先答你，想有秘密！」問她是否有好消息要公布？阿Sa笑言：「唔知。（有意中人？）你真係聰明。（幾時正式公布？）搵日先再講。」

馬里奧毛瑞爾被問到昨晚獲大會安排食飯，兼跟阿Sa預祝生日，他笑言：「好開心！可惜今次嚟香港比較短時間，只有3日2夜，12月會同屋企人再嚟香港旅行，自己好想去旺角和銅鑼灣購物，又想買Labubu公仔。」提到其主演電影《Tiger》將會泰國上映，首次拍動作片的他，直言為了該片，接受了兩星期策騎和武術訓練，電影花了4個月才拍攝完成。

東網網站 : https://on.cc/東網Facebook專頁 : https://www.facebook.com/onccnews/