樺加沙塌樹｜逾千宗塌樹 樹博士把脈：大部份冇乜根 記者直擊多區「短根塌樹」 愛民邨塌樹可救？
超強颱風樺加沙襲港，多個政府部門收逾千宗塌樹報告。在何文田愛民邨，更有陪同居民成長半世紀的印度榕樹被連根拔起，《集誌社》周四（25日）早上到場視察，政府承辦商正鋸開部分枝葉，工作人員在樹根噴水。除了愛民邨，記者昨天、今日採訪，在沙田中央公園、黃大仙下邨、坪石邨、順天邨、彩虹邨、牛頭角下邨、美孚等地方，都見到類近的「短根塌樹」。
十年樹木，「樹博士」詹志勇說：「你睇到倒下來嘅樹，大部分都冇乜根」。他指出從生長空間至土壤質素，市區塌樹因素處處，但都可控，難過之餘，寄望社會汲取教訓，「種樹唔同買樓買車，只會隨時間升值，點解唔畀多啲心機種？」他指出，樹根主要向橫生長，主要以泥下 60 厘米左右，最為密集、樹冠、樹根的生長的闊度應相若。
長春社總監蘇國賢說，樹木始終是結構物，颱風過境下不可能全部倖免，但仍可依靠頻密修剪以減低倒塌機會；「每一次有呢啲情況（極端天氣）同一時間應該收集多啲數據…乜嘢情況會冧樹？乜嘢環境、乜嘢樹種，甚至睇埋究竟係咪泥土裡面有問題，呢啲我哋都要盡快科學化去學習、去改變。」
詹志勇：愛民邨榕樹品種「無泥都可照生」
樺加沙為本港帶來今年第二個「十號風球」，懸掛 10 小時 40 分；最接近時，於本港以南 100 公里外掠過，《集誌社》盤點由記者採訪、網民分享、政府公布的塌樹資料，最令坊間關注的，是愛民邨一棵約八層樓高、屹立數十年的印度榕倒下。
教育大學講座教授及顧問（地理及環境科學）詹志勇看過美孚、黃大仙，以及愛民邨的塌樹相片，就愛民邨情況，他指，「你可唔可以幻想一棵咁巨型嘅樹，啲根就喺面嗰度，咁梗係企唔穩。」
各區塌樹直擊
泥下 60 厘米左右 根部最密集
愛民邨於 1974 年入伙，街坊說，印度榕約有半世紀歷史。詹志勇形容，該品種非常頑強，「幾乎無泥都可以照生」，但當根未扎穩，即使不是颱風，仍有機會塌下，香港過去也有事例；甚至可說是颱風令市民足不出戶，才不致人命傷亡。
他解釋，樹根主要向橫生長，主要以泥下 60 厘米左右，最為密集；但面積、深度同樣重要。他遂以「工」字，比喻樹冠、樹根的生長關係指，兩者生長情況相若，但受不同因素影響。以今次愛民邨的老樹為例，可以是土壤品質欠佳，導致樹根生長不足，同時未能抓緊原有面積不足的泥土。另一邊廂，城市每逢颱風塌樹，則可能是規劃種樹時，未按樹種實際生長高度、環境而適當種植。
塌樹或因生長空間不足
詹志勇說，樹木生長是累計，意即樹會將養份貯起，「你以為種唔到大樹，但十幾廿年後，最終都可以生到十米八米高。」他續稱，當早年規劃沒做好，樹還是在積存養份。「平時唔係好大風嗰陣，佢咪勉強企得穩；如果風太大咪倒下；你睇到倒下來嘅樹大部分都冇乜根。」
詹志勇：點解唔畀多啲心機種？
伴隨街坊成長的大樹，在一夕之間塌下。詹志勇指，任何發展項目，如有意保留樹木，確是美事；但單單保存是無助樹木生長。「由得佢困喺好細嘅土壤條件底下，唔係淨係小土壤…差嘅意思係好薄、好多沙石、冇乜養份、壓到好實，面頭又畀混凝土密封…嗰啲土壤就算有，都係好差嘅土壤。」
他續說，山竹令逾六萬棵樹倒下，當時已淘汰大批「弱樹」，無奈新樹未種成，又迎來一次塌樹潮，他感不開心。他強調，「土壤條件一日不解決，永遠都係重複又重複，不停咁製造弱樹。」城市追求綠化，他寄望政府不要只停留最基本的種樹概念，要多費心神留意樹木的生長空間，未來新發展區也應考慮怎樣處理綠化區，「種樹唔同買樓買車，只會隨時間升值（環境價值），點解唔畀多啲心機種？」
長春社：樹根淺不尋常 或存物理限制阻其生長
長春社總監蘇國賢說，首先要接受樹木終究是結構物，對風力有一定承受上限，颱風過境下不可能全部倖免，尤其今次樺加沙不是尋常的熱帶風暴。
他按相片觀察，指出愛民邨老樹沒有腐蝕情況；另從樹種為榕屬看，「啲根（生長）唔係好怕缺氧，同埋出咗名係有啲『霸道』，理論上可以左瓹右瓹都無問題」，今次樹塌時，見到樹根較淺，是不尋常。
樹底有積水
他表示，樹木倒塌後，觀察到樹底有積水，會否是再深層泥土被壓實，無法疏水導致樹根生長空間有限。「啲根向橫生得唔夠遠，其實比較大可能性，就係有啲物理性限制。」在連續大雨下，表層泥土被翻鬆，就令樹根未能抓緊，最終塌下。
至於樹木的生長位置，他認為以其生長空間而言「唔算十分差」，但確實未足夠。蘇國賢續說，印度榕樹冠枝葉密集，將其比喻作風帆受力，但樹木可依靠頻密修剪疏導風流，以減低倒塌機會。
各區塌樹直擊
能否「原址重植」？ 詹志勇：可試，但要馬上做
至於大眾最關心，老榕樹能否「原址重植」，詹志勇指：「可以嘗試，但要馬上進行，不可再等。」蘇國賢則道，「就咁睇，你話佢有好大結構問題，或者根嘅斷裂；睇嚟又唔係…譬如好直接咁扶返起佢，再搵大支架撐住，再大幅修剪，呢隻樹種都受到；理論上其實應該係有得救。」「不過我哋咁樣講，相對容易；佢哋去到執行嘅時候可能仲有好多其他考慮，譬如完全唔收錢，（都）要有一個起重機，可以吊得起咁大棵樹。」
房署安排承辦商先鋸開部分枝葉，九龍城委任區議員左匯雄指，就塌樹去向，房署已與樹木組溝通，「初步構思係將帶有根嘅樹枝，培植種返」，亦認為或能以枯枝作保育或紀念品。
歡迎追蹤以下平台，即時接收《集誌社》最新資訊，及付費訂閱支持！
【付費訂閱《集誌社》】
https://thecollectivehk.com/subscribe/
【訂閱《集誌社》Youtube】
https://www.youtube.com/@thecollectivehk
【Like 《集誌社》IG】
https://www.instagram.com/the_collectivehk/