抗癌柯煒林首度演出《笨蕉》 謝幕時感動哽咽：舞台劇魔力好大

柯煒林（Will）於7月底公布患肺腺癌第4期，原本他有份演出的舞台劇《笨蕉大劇院》，亦需在公演前換角，改由余家溢演出他的角色。昨晚（5日）《笨蕉大劇院》公演第25場，而Will亦終於正式演出，官方公布昨晚亦公布餘下場次演出安排：「第25場Happy Friday，Will嘅業務用酒粒出場喇！再次多謝大家對Will嘅關心同慰問，佢已經準備好今晚嘅演出！《笨蕉大劇院》團隊依然會以佢嘅身體狀況為首要考量，希望Will能夠有充分休息，所以其後Wilson之角色將分別由Will或余家溢出演，而不作另行通知，懇請大家多多支持及體諒！」

Will在台上發表感言時，獲全場如雷掌聲，「由8月8日到𠵱家，經歷咗一段長時間，但呢一刻想同大家講，舞台劇魔力好大，有時我會覺得唔太好彩患呢個病，但亦都好彩喺呢個時候，我知道自己有呢個病，因為，因為咁啱呢個時間《笨蕉大劇院》所有人陪我度過。

我唔想大家淨係記得我係一個患咗病人，我一直都由大家認識我到𠵱家，我都係一個演員，我好少會專登講私人事情，好少專登提演戲以外嘅東西，因為我一直自覺演員本分，如果唔係有《笨蕉大劇院》呢個舞台劇，其實我未必會公布患病呢件事，但亦因為公布後，所以得到咁多嘅愛。」

他續說：「我得到咁多愛後，我亦慢慢恢復，我下一步就希望帶更好更多作品畀你哋睇，唔好講我話病唔病，我係第一次踩台板，而我係畀你哋Drive走咗，觀眾魔力真係好大，因為呢個病除令我學到一啲嘢，啱啱呢一課，對住你哋，我好似喺演員事上亦學多咗一課，我可以繼續繼續演戲演落去，因為呢個就係我生活，我會保持生活如常﹑如常生活，點解我要返嚟就係咁嘅原因，呢段時間除咗我家人外，陪我行呢條路就係佢哋，我同佢哋唔係好熟，但因為佢哋，我呢段路行得輕鬆咗，所以我會繼續演好每一個角色，做好我演員本分。」最後Will在台上與團隊擁抱道謝，尤其與替他演出的余家溢抱得特別肉緊。

（即時娛樂）