明明沙漠乜都冇｜梁彥宗超市被捉入房 驚慌變驚喜 娟姐「爆喼」無阻購物決心

ViuTV節目《明明沙漠乜都冇》逢星期一至五晚上10時30分播放。梁彥宗（Chris）作為「冷門」旅遊目的地的專家，伙拍識食識玩的練美娟（娟姐），飛到3個擁有「世一沙漠」之稱的國度，實現食、買、玩和「打卡」全面體驗！

今晚（11日） 播出一集，Chris和娟姐前往伊斯蘭教的第二大聖城——麥地那（Madinah）。拍攝時正值齋戒月，到埗後2人率先到超級市場購買乾糧，以備不時之需。當2人買得興起時，卻突然被人叫停，更將Chris帶入一個房間，這突如其來的情况，頓時令娟姐大感驚慌。

正當大家不知所措的時候，Chris回來並表示：「佢話請我哋食嘢啊！」娟姐聽後不禁「吓」了一聲！Chris續說：「頭先經理捉咗我入房，我以為佢唔畀我哋拍攝，跟住佢問我哋做咩，係咪要影晒成個Supermarket？我話係啦，跟住佢突然話『You Are My Guest，你哋買嘢千祈唔好自己畀錢』，叫我哋揀好晒之後搵佢，佢會帶我哋去Cashier度找數。」

經歷完「驚嚇」事件後，2人隨即展開神聖一天，遊覽麥地那重要地標，包括弓箭手山、雙朝向清真寺、庫巴清真寺，以及繼麥加的禁寺之後，第二神聖的先知寺。朝聖之餘，2人不忘逛街購物，娟姐喜歡一張參考清真寺內部設計的地毯，難得遇到心頭好，即時燃起購物慾，製作組見狀即提醒娟姐：「你個喼仲有位咩？」娟姐回應：「有啩？你哋個喼咪有位囉！」大家堅決地表態：「我個喼爆咗㗎喇！」但這仍然無法阻止娟姐購買決心：「再唔係咪手拎囉﹗」

（即時娛樂）