倪晨曦廣告接唔停　榮登KOL銷售額冠軍

藝人倪晨曦（Elva）今日（27日）帶同4歲大仔Virgil一同出席活動，分享環保訊息。身為3孩之母的Elva，表示平日會教導小朋友環保意識，笑言家中最重視不浪費食物，外出吃飯會教小朋友吃多少才點多少，她説：「小朋友食剩嘅食物爸爸會食晒，有次小朋友中咗手足口病，諗住大人唔會中，結果老公食咗小朋友口水尾都中埋。」她坦言老公中招後喉嚨痛得難以吞嚥，手指周圍的皮膚問題也要個多月時間才康復，問是否買到教訓？她笑謂：「佢應該會照食，因為佢好唔鍾意浪費食物。（老公食到肥？）都有個肚腩，哈哈！不過佢每星期都有做運動。（同你一齊做瑜伽？）好難，我平時都係攝時間做。」

談到早前有媒體廣告分析平台公布，Elva成為今年首季10大社交媒體品牌廣告銷售額最高的KOL，她笑指覺得其他人比她做得更多，認為計算方法未必準確，純粹「得啖笑」，提到首6位皆為媽媽，她笑指大家也在努力賺奶粉錢，又認為不少現代女性結婚生子後也希望有自己事業，問到她如何分配時間照顧3名孩子同時兼顧事業？她指隨着小朋友長大開始上學，自己時間變得鬆動，又指雖然之前的確將大部分時間放在孩子身上，變相減少了工作，但能親眼看着小朋友成長覺得很開心。

東網網站 : https://on.cc/東網Facebook專頁 : https://www.facebook.com/onccnews/