頒獎禮＝平常心？ 「有音樂就會有獎項」
【頒獎禮就要平常心？】
「乜張敬軒咁恨獎？」「連佢都要做到咁肉酸？」
呢兩句，嚟自我11月路過旺角街站，旁邊兩位男士嘅真實對白。
每年叱咤前夕，全部記者都會問一條問題：「有冇信心攞獎啊？」絕大多數歌手都會答「平常心」、「入圍已經好開心」、「當去 party」、「無諗太多」、「當係 bonus」… 總之就表現得唔太在乎，然後退一萬步感恩自己擁有嘅嘢，過去一年做過嘅事。
到底真係平常心，定因為要官腔，答平常心，只有自己最清楚。成日聽人講，得失心唔好咁重，或者，叱咤只係商業遊戲，唔洗認真。到今年，聽得最多嘅三個字係「玩爛咗」。
獎項有幾多意義，你知、我知、台下坐足全晚嘅歌手知、台上歌手更加知。你睇睇出道15年，@on_callstar表演時依然有種「青澀的抖震。」
比起身邊嘅朋友，我從來稱唔上係張敬軒嘅 fans。但從我能夠接觸嘅範疇裏，我聽到都係佢敬業嘅説話。今年佢高調為自己拉票，由公佈「無論得獎與否都會照做樂壇政綱」到落區拉票、開 IG Live、再到寫聖誕揮春、量血壓，歌迷當然樂見張敬軒親自落區。但網上又好，街邊路人都好，都引起唔同嘅反應，正如我第一段聽到嘅。
「咁恨獎？」背後隱含嘅係使乜花咁多心機爭取叱咤呢個獎，既針對心態，亦針對叱咤，質疑仲落心落力玩緊呢個遊戲嘅張敬軒。但由未得獎開始，我已經諗唔明，點解落力為自己拉票，就係唔可取？
我認為呢個心態唔係壞事。答傳媒問題，唔洗逼自己扮唔care，唔洗扮佛系、睇開啲，更重要係，唔會口是心非，言行不一。明明內心渴求認可，就扮平常心。無論因為歌迷支持，定任何原因，張敬軒想當選「叱咤樂壇我最喜愛的男歌手」，就用最身體力行嘅方法爭取，遊説大家支持自己。
尤其對一個出道 22 年嘅歌手嚟講，要表達對獎項嘅嚮往絕對唔容易。對內，至尊歌曲大獎、男歌手金獎、至尊唱片大獎、最喜愛的歌曲大獎等等早已係囊中物。相比坐喺附近嘅後浪，無論係地位、認可、人氣，張敬軒「從不缺」。再直白啲講，佢根本唔需要多任何一座獎去證明自己。稍有差池，就會被人覺得，「仲做咁多爭獎？」
對外，叱咤「我最喜愛」系列，街外人同鏡粉嘅參與此消彼長，甚至到尹光嘅出現，投票爭議不斷。對呢個獎項表達追求，存在好多風險，稍有不慎，就會被人覺得，「個獎玩爛咗都要？」
但當張敬軒用沉澱22年嘅歷練、最謙卑嘅態度，相隔10年二度捧起「我最喜愛的男歌手」，一句肉緊嘅「 多謝大家！」，難以掩飾嘅笑容，佢就成為賦予獎項最大意義嘅嗰個人。
到「想它變真嗎 每日挖點沙 按部砌好它」，張敬軒左手舉高，再緊抱入懷嘅畫面。呢份對獎項有追求嘅誠實，配上美夢成真嘅感動，大概係近年叱咤，無可取代嘅畫面。
當然，佢嘅致謝辭依舊可圈可點。多謝投票嘅朋友少不免，但「多謝 Mirror 嘅 fans」、「多謝連登」呢兩句足以見到佢嘅胸襟。事後訪問，佢再一次多謝尹光嘅出現，多謝 Mirror、林家謙、MC 等等嘅 cross fans，證明佢真係知道，2023年嘅香港發生緊咩事，用真誠，又面面俱圓嘅表達為2023「我最喜愛的男歌手」呈現皆大歡喜嘅結局。
每個人睇嘅嘢可以唔同，無啱定錯。當然，你依然可以見到，叱咤只係一個商業遊戲，落力爭取獎項無意義。但同時因為張敬軒緊張獎項、落力拉票，琴晚帶畀無數人無可複製嘅回憶，帶畀電視機每一位觀眾，台下坐嘅每一個後浪力量。
不如以張敬軒後台訪問嘅一句結尾——「有音樂就會有獎項。」10年過去，身邊嘅觀眾由容祖兒、王菀之變成林家謙、陳蕾，唯一不變嘅，係張敬軒第一句繼續高呼「多謝大家」以及林海峰當年頒獎所言——「佢對藝術創作嘅追求，已經達到神經級。」多謝你對自己嘅誠實、對作品嘅追求、對香港樂壇做過嘅行動。
就算唔係佢歌迷都好，張敬軒先生係一個，人越大，越多經歷，越無辦法討厭嘅一個人。恭喜你！@hinscheung
想睇更多同類型文章：https://www.instagram.com/besidesmusichk/
支持 Besides：https://www.buymeacoffee.com/besidesmusic
樂迷投稿：https://docs.google.com/forms/d/e/1FAIpQLSeXQhj2bTugDRTnF2-HkOwemGjHSm9OYGqwn5NBeAWhT1VU-w/viewform
留言 1