香港美食：【麥當勞脆香素菇飽再度登場！限定4天！全港只此一間發售！】

脆香素菇飽 ｜麥當勞脆香素菇飽再度登場！

麥當勞推長洲限定脆香素菇飽！一年一度嘅長洲太平清醮即將開鑼啦！想知香港邊度搵到最應節嘅齋菜？就係長洲麥當勞啦！全港獨家限定，呢間分店由即日起至5月5日再度推出「脆香素菇飽」，等大家食齋都可以食得過癮又有意義！呢個 飽只有長洲分店先食到，傳說食咗之後平平安安、好事近身，難怪年年有咁多街坊買嚟食。過去未試過嘅朋友仔記得要快啲mark實日子，感受節日氣氛之餘仲可以品嚐到呢款全港獨有嘅美食，絕對係打卡兼祈福嘅必試選擇！

▲ 一年一度嘅長洲太平清醮將於今年5月隆重登場，呢個被列為國家級非物質文化遺產嘅香港獨有民間節慶，每年都吸引大量本地同海外遊客專程去長洲體驗！想睇飄色會景巡遊，為「搶包山比賽」嘅健兒打氣，記得要早啲計劃行程啦！

▲ 按照長洲嘅傳統習俗，居民會喺太平清醮期間禁殺生同守齋戒三日。佢哋通常會喺佛誕兩天前開始齋戒，呢段時間，島上居民會禁食肉類、蛋類同奶品，以示尊重節日傳統同祈求平安。

▲ 因應呢個傳統，麥當勞長洲分店亦會配合當地習俗，喺太平清醮期間停止供應含有蛋奶及肉類嘅食品，改為推出「脆香素菇飽」呢款全港獨家限定美食。

▲ 素菇飽嘅主角係用菇、紅蘿蔔同粟米製成嘅素炸物，代替平時嘅肉類漢堡扒，既合乎傳統齋戒要求，又保留麥當勞招牌嘅美味。

文字：香港人遊香港