【小店系列】食粥食飯要聽天由命，我現時只不過想落街食碗麵啫!

長沙灣有間新開了不久的粥麵店「囍麵」，低調地座落在近荔枝角工商廈區的福華街一角。

作者: 飛叔

限聚令期間，不容易見你一面，唯有獨個兒落街食碗麵。

鄰近我家的福華街有頗多食店，單是咖啡店都有三間，又有間永遠要排隊的壽司郎，但我不需要成日飲咖啡和食壽司，有時只想簡簡單單有碗麵或粥就夠，好在近期有間粥麵店「囍麵」開了在這條街上，令街坊多一個選擇。

囍麵室內環境簡樸，並沒有什麼打卡位，但是頗為乾淨四正，來到就是單純為了醫肚。

首次來到時，叫了碗「雲吞麵」($33)。

店子餐牌上寫住用大地魚湯底，飲落又確實堅有魚湯味，儘管雲吞不算包得特別出色，但湯底搭夠，加上麵條都打得不錯，這碗麵仍是合格有餘的。

另一次再來幫襯，則叫了碗「秘製牛肚麵」($33)。

湯底仍是魚湯，但當放了牛肚後，感覺多了份腩汁及微辣的味道，更為濃郁。

牛肚處理得不錯，每件切得平均，質感爽滑，比起雲吞麵，我更愛這碗牛肚麵。

這店還供應近年在港常見的即拉石磨腸粉，俗稱皺皮腸粉，我就試過鮮蝦雞蛋和豬潤雞蛋兩款，腸粉做得滑溜而煙韌度高，有雞蛋是特別香的，而兩款之中，鮮蝦配料那款處理得比較好，豬潤則略為過熟。

喜見長沙灣區除了咖啡店外，又有間頗有水準的粥麵店，令街坊們有得溫飽。

現時食粥食飯都係要聽天由命，幾時清零? 邊個知啫，希望大家的荷包都唔好咁快清零，尤其餐飲業要頂住呀!

囍麵 Hei Min

地址: 長沙灣福華街586號地舖

電話: 24021941

營業時間: 星期一至五 07:45 – 21:00

請關注飛叔平台:

Facebook專頁:  飛叔生活 Kelvin Leung 

Instagram: kelvinyfl

YouTube: 飛叔Kelvin Leung