[荃灣隱世茶室‧細味茶道藝術] 🌼🌿✨

發布於 2021年06月27日02:00 • Echo Cheung

香港有唔少茶室，但精細到有埋茶藝師駐場嘅店就不多。

早2日紅雨下，嚟到荃灣新開嘅樓上茶室「茶療 Tea Therapy」。茶室布置洋溢復古嘅中日情懷，有日式榻榻米，又有中式茶具及字畫，置身其中，不其然就有種舒心感。此外，個人好愛店家嘅90度落地大窗位，可以觀賞到荃灣景致之餘，造訪當日，窗外仲落著朦朧驟雨，掛滿雨珠嘅窗台，加上室內嘅微黃鎢絲燈，對比陽光充足嘅日子，又係另一番韻味。

⚠️ 茶療必須預約，inbox訂位後，店家就會提供地址。

餐飲方面，茶療自然喺茶為主，食為次。店家主打一系列精品高山茶，好似當日我跟朋友飲嘅「月光白茶」及「老叢白仙」，均係用原片茶葉沖泡嘅高級品，由於成本較高昂，所以市面亦較為少見。

整個泡茶過程，茶藝師Candy都會親自主理，由溫杯、溫蓋碗、聞香、斟水……每個過程都有詳細講解，過程一絲不笱。

至於食物則係佐茶輕食為主，好似蛋糕、果凍或酥餅之類，每月會定期更新Menu，令人時時嚟都有不同驚喜。

✦ 月光白茶

名為月光白茶，自然係要夜晚採摘。Candy指呢種茶產自雲南，葉體有一面舖滿雪白嘅絨毛，可去火，去痘，調節內分泌，營養價值極高。個人就好愛呢款茶嘅香氣，熱水一落，就散發陣陣清新嘅花香及露水香，口感醇厚，飲後齒頰留香。

✦ 老叢八仙

呢款八仙單叢茶，係鳳凰單叢中十大花蜜香型珍貴名從之一。喺百年老茶樹中採摘，特色係擁有一種獨特嘅山韻蜜味。對比白茶，呢款茶會比較濃味，初入口口感柔滑，水中帶香，隨即而來係一股濃郁奶香味，帶微微甜味，回甘力強。

✦ 鮮檸檬忌廉配戚風蛋糕

戚風蛋糕好鬆軟，配酸酸地鮮檸檬忌廉，成件事都幾清新。

✦ 蘋果酥皮吉士批

蘋果酥帶有濃濃嘅玉桂味，好鮮甜，中和咗吉士醬嘅甜膩，整體感覺不錯。