俠醫｜61歲林映輝演苦情戲崩潰爆喊 Kelly熱舞搶鏡曬長腿　

無綫劇《俠醫》昨晚（9日）播出第7集，「壞蛋三人組」鄧世鏗（丁子朗飾）、鄧力圖（鄭子誠飾）及甘雁鳳（江欣燕飾）聯合媒體抹黑凌為民（陳豪飾）創造的藥油，從而提高「任遠藥油」的市場地位，並暗中收取回佣獲利。凌為民得知3人詭計後，拜託細姨鄧佩霞（林映輝飾）幫忙調查任遠公司帳目，佩霞向為民透露任遠確有不明帳目，但礙於自己欠公司債務、故長期只能啞忍兼被剝削。

性格蛇𠺌的佩霞，昨晚按凌為民要求，嘗試調查及勸阻「壞蛋三人組」惡行，可惜反遭3人冷嘲熱諷，長期飽受欺凌及剝削的佩霞，同時還要面對家中兒子家俊（馮皓揚飾）的不生性，最終壓力爆煲瘋狂咆吼兼崩潰，輝仔亦演出角色苦况。

以主持形象入屋多年的輝仔，謙稱拍劇經驗相對較少，及以往多演繹主持角色，故今次獲邀演出有挑戰性角色，大為緊張及感恩，並指起初拍攝時有很多不適應地方：「今次好多謝佢哋大膽起用我，都好大挑戰，但因為我好耐冇拍劇，好多嘢都要適應。最難忘係有次拍完通頂戲、第2日要開《東張》，因為做《東張》講求專注，所以對體力都係考驗，都好多謝《東張》願意配合我，畀我盡早拍晒啲訪問先。」

輝仔指感謝劇中壞人子誠及欣欣鼓勵及陪伴：「子誠真係畀咗好多正能量，佢同欣欣因為劇入面都會鬧我、欣欣甚至會篤我，但現實子誠見到我咁佢好心痛，因為佢覺得我應該係被保護嘅。同埋佢成日讚我做得好，畀咗好多鼓勵我。欣欣佢好早做晒功課，佢成日Share自己啲功課畀我，又教我睇咗分場先咁，好多謝佢咁無私分享。」

輝仔又笑指拍《俠醫》最難忘是有「食神」，先後遇過陳豪請食小食等、張曦雯請食糖水、監製請食點心、及以陳豪及Kelly請食Pizza等。輝仔還開心分享與陳豪合照，照片所見，現年61歲的輝仔狀態不俗，網民讚她凍齡有方。

昨晚另一焦點場口，是張曦雯（Kelly）為時約1分鐘的「free flow開心舞」！身穿藍直間恤衫、配以牛仔熱褲的Kelly，在劇組挑選的BGM襯托下熱舞，除了不斷原地轉圈揈馬尾，還上演向後拗腰、扭臀等動作，配以修長美腿、23吋纖腰、燦爛笑容，及連串自high表情包，完美演繹出歌詞中的Good Feeling。林

Kelly笑言：「嗰段跳舞係free flow嘅，現場係所有人包括crew都聽住首歌嚟拍，大家都喺個mood入面，我跳起上嚟都唔覺得太awk，可以放啲。我自己都好鍾意跳舞嘅，平時聽到鍾意嘅音樂都會un吓。」Kelly這次演出《俠醫》絕對新鮮感滿滿，除了零專業感的「Loser Rachel」人設令人眼前一亮，還帶出了平時在劇集難得一見的活潑一面！

（即時娛樂）