三十歲曾經是女人關口｜周靈山
以前，三十是女人的關口，過了這關被人讚句「唔似」，心入面會暗喜。如今，護膚品、醫美、營養補充品大行其道，防線推到五十，一群美魔女幕前鬥靚，被誇「邊似五十！」馬上笑住講多謝。
但其實，六十才是真關口。
更年期滴水不漏完成，生育系統正式退休，荷爾蒙一減，骨膠原一失，就算你後生時眼大鼻高、面尖唇厚，如今一樣會眼皮跌、大細眼、鼻骨現形、嘴角向下、面珠下垂。再加一頭白髮、頸紋、手背斑，五十走向六十的這3,650日裏，日日對住鏡望自己變老、聽住把聲變沉，連講話都因為牙肉鬆牙齒走位而開始漏風，冇番咁上下自信，真係唔易過。
我雖未到那個年紀，但慶幸年輕時有緣學懂：人生最終，不過是求個「死而無憾」；外表、錢財、情緣都是過眼雲煙。但不是人人有這種機緣早早看透，所以若你怕老，你沒有錯。因為，從來無人教我們如何老，學校冇教，社會冇提，我們都是自己摸黑上路，自己感受變化，一步一步頂硬上。
所以，未經他人苦，就別笑人打Botox。一個好簡單的推理：以前三十而老，今天五十仍可後生；以前冇手機冇AI，今天非常普遍。一代比一代醒，是必然。你今天口賤笑人老，等同培育下一代比你更口賤，將來他們會怎樣更精準地恥笑你？即管繼續口賤看看。
在我看來，只要好好活着，人人都美。老，不是醜；怕老，也不羞恥。最緊要明白，變老是必然；如果去活，才是選擇。
個人網站︰http://slimcook.hk
facebook︰http://www.facebook.com/lively.com.hk/
Instagram︰echow03