2024年港產片熱潮再起　中生代演員開始接捧

2024年的香港電影

2023年算係港產片稍為令人失望嘅一年，雖然有《毒舌大狀》一枝獨秀，但其他作品成績只係普普通通。當唔少觀眾包括我對2024都不抱太大期望時，港產片卻意外地寫下燦爛一頁，嚟緊就帶大家回顧一下。

港產片熱潮再起
年初由三套風格各異嘅賀歲片打頭陣，吸引到唔同口味嘅觀眾，票房算係非常理想，為2024開咗個靚頭。到年中就有《九龍城寨之圍城》令人歎為觀止，原來香港仲可以拍到咁大規模嘅動作片，成功打出一片天。

熱鬧過後，暑假檔期卻相較往年沉寂，正當我以為港產片熱潮將會淡然結束時，勢估唔到年尾能夠再下一城。

先有《我談的那場戀愛》贏盡口碑，帶大家進入一場浪漫戀愛遊戲；再有《焚城》震撼銀幕，毫無冷場地燃起一鼓熱血使命感；《破·地獄》更加破盡記錄，掀起一股前所未有嘅潮流，連一班甚少入戲院嘅觀眾都紛紛支持，勢估唔到《毒舌大狀》嘅一哥地位咁快被打破；最後由《爸爸》、《久別重逢》同《誤判》為2024畫下豐富且完滿句號。

以舊帶新
2024年港產片依然由資深演員為骨幹，但中生代演員已經開始接捧。《破·地獄》除咗黃子華同許冠文，朱康同衛詩雅都大獲好評；《城寨》後段更加由四子全力擔正，戲內戲外都象徵傳承。而新生代演員亦大放異彩，《我談的那場戀愛》嘅MC、《填詞L》嘅鍾雪瑩、《爸爸》嘅蘇文濤、《久別重逢》嘅許恩怡等等都令觀眾眼前一亮，香港電影唔再後繼無人。

百花齊放
去年探討社會議題嘅四字電影開始退場，取而代之係各種類型嘅作品，警匪、喜劇、愛情、動作題材同樣收獲佳績。好似我相當喜歡《我談的那場戀愛》、《盜月者》同《填詞L》都非常有新鮮感，港產片唔再係部分人所講嘅一味靠賣慘。

美中不足
雖然去年香港電影誕生眾多佳作，但亦有未如預期嘅作品。首當其衝絕對係《12怪盜》，難得十二子聚首一堂，竟然拍出一套睇完都唔知想點嘅戲，可以話打爛一手好牌；《飯戲攻心2》雖然整體算唔錯，但比起上集顯然無咁感動同搞笑，稍為失色。

另外，亦有口碑唔錯嘅電影票房麻麻。例如《從今以後》獲得金馬眾多提名，耐何取材同演員陣容差咗少少吸引力，所以喺香港迴響唔算大；《寄了一整個春天》則運氣欠乏，上映檔期撞正勢如破竹嘅《破地獄》，當陸續收獲好評時，已經無咩場次選擇，可惜可惜。

其他現象
過去幾年出現為數不少以偶像掛帥嘅電影，甚至有人認為港產片賣座原因之一係靠粉絲們多刷。到2024年明星效應開始減退，基本上得上述嘅《12怪盜》係單憑偶像賣票。我就一向唔太介意依個現象，畢竟的確為港產片帶嚟新觀眾。再者，年初嘅《盗月者》再次證明偶像擔正仍然能拍出精彩作品。

另外，合拍片或者主力traget內地觀眾嘅電影繼績息微。去年嘅例子有《海關戰線》同《潛行》，兩套劇情真係唔太掂，只靠動作場面充撐同大牌明星作賣點。雖然仲有一定基本盤，但已經無法再複雜《怒火》、《拆彈專家2》等電影嘅成功。

香港電影不會死
十年八年前開始，樂壇已死，港產片已死嘅命題周不時就會出現。不過香港電影2024年成功用票房說話，證明港產片只要有質素，就一定會受到觀眾支持。

當疫情過去，大家唔太願意留港消費下，香港電影成績能夠比過去幾年都要好，產出兩部過億作品，撼贏一眾荷里活大作，不同平台嘅電影搜尋榜仲幾乎由港產片獨霸，實在值得慶賀。感謝一班堅持做好電影嘅台前幕後，為影迷帶嚟豐富一年。

即使距離真正興旺尚有漫漫長路，電影業未來亦挑戰連連，但絕對充滿希望。只要保持依份士氣同熱誠，香港電影一定長做長有，2025再會！

我愛港產片！

▼Follow hkpopculturelover
Instagram: https://www.instagram.com/hkpopculturelover/