面對勁敵Eddie出招 GM不敢怠慢 浪漫柔情告白冧爆葉蒨文

無綫戀綜真人騷《女神配對計劃 最後告白》，今晚（8日）起一星期播出六集結局篇。為迎接《最後告白》，製作組上周四（4日）開始，陸續推出12位求愛勇者向心儀女神說出「十年後深情告白」，今日（8日）最後登場的，是葉蒨文（Sophie）組的曾展望GM及林堡熙Eddie！

雖然GM與Sophie早已被熱捧為CP，但面對強敵Eddie以各式各樣深情招數、眼神及微笑強攻女神芳心，GM不敢怠慢，在「十年後深情告白」中收起調皮轉Sell深情溫柔、配以鋼琴版節目主題曲《女神戀愛腦》，感覺浪漫：「Hello Sophie，估唔到我哋咁快就一齊咗咁耐喇，1年、2年、5年、10年，同你一齊嘅時間過得好快，可能開心嘅時間過得特別快」、「可能好多時我哋都冇做啲咩特別嘢，可能都好日常生活，一齊食飯呀、打機，但呢啲生活好開心」、「我覺得由第一日識你，我就覺得我哋都幾有緣分，我咁啱出生日期同林子祥一樣，你員工證號碼原來同我用咗10幾年嘅電話號碼頭4隻字係一樣嘅！好多嘢都好似整定咁。」

「我覺得10年後呢，我哋應該仲會咁癡纏，可能每日都黐埋一嚿，因為我知你都係一個黐男人嘅人，可能我哋會有自己嘅家庭，跟住我會帶你去探險、我會照顧你，我希望（你人）愈大，你就可以活得愈細、就好似小女孩咁、我會盡能力去照顧你、保護你，都多謝你喺我最唔開心嘅時間出嚟陪住我，我會繼續努力守護你。」

被視為GM勁敵的Eddie，由於I人性格，告白內容亦內斂得多：「我覺得幸福唔係好誇張嘅嘢、係啲好生活化、好簡單，好可以持續落去做嘅嘢」、「我可以同你一齊打網球、可以帶你打閃避球、可以帶你出海，畀你感受吓我平時喺海入面感受到嘅自由，帶你玩《狼人殺》，想睇吓你做狼嘅樣」、「我覺得我哋都係鍾意探險嘅人，所以我哋睇嘅嘢會相似」，之後Eddie饒有深意地向鏡頭說：「十年後嘅嘢再算啦。」

（即時娛樂）