47人案．岑子杰｜出獄後重新摸索紅線「記住受苦嘅人」　重返瀝源邨見街坊「係呢度我有個未完成責任」

47 人案被判入獄 51 個月的前民陣召集人岑子杰，今天（30日）獲釋。在囚逾四年首次公開露面，他說深深感受到牆外的溫暖。這些年在獄中「肥咗又瘦咗」，經歷過很多不開心和無力，但也慢慢恢復過來，「我都希望大家振作，反正係咪都要生活，我哋就好努力去生活」。雖然獲釋，但岑說想到很多人正受苦，令他心情複雜：「我對自己嘅期許係記住受苦嘅人，因為我真係喺呢四年裡面，感受到好多嘅關心，呢啲關心對我嚟講好重要。」

對於未來，岑子杰說要重新摸索紅線在哪裡，但暫時沒有打算離開香港，「因為始終一啲對我嚟講好重要嘅人都喺香港」。在佐敦住所逗留約三小時，他便往 2019 年當選區議員的沙田瀝源邨，與朋友相聚，也見見街坊和視察區內情況：「我覺得喺呢度有一個未完成嘅責任，所以好想返呢度睇一睇個情況。」

「覺得同個社會都脫咗節」

久未與傳媒見面，他着記者慢慢設置咪高峰、又與相熟記者打招呼，自嘲發言「冇乜營養㗎咋」，笑時露出兩眼的魚尾紋。咪架設好後，以往常面對傳媒的他「自動波」說「咁我自己講嘢啦」，續說：「真係唔知有咩好講，因為啱啱真係經歷咗四年，覺得同個社會都脫咗節，要我評論依家發生嘅事真係無能為力，講任何嘢都有啲不負責任。」

對於獲釋，岑說心情很複雜，一方面有開心，因為「我都一定比我噚日自由」，但同時知道很多人正在受苦，「亦都令我覺得自己唔可以太開心」。他也有擔心：「究竟我有冇自由咗，我都想知」；久未與傳媒見面亦教他緊張，不知如何回應，但他覺得對新聞最重要的，是「你肯問我就肯回應，咁先可以繼續有新聞」。

在獄中「又肥咗又瘦咗」

岑子杰說，四年來「好感受到牆外面嘅溫暖」，感謝家人八號風球一落波便趕過來的堅持、感謝一直寄信來的人令他知道世界發生什麼事，他自言獄中「又肥咗又瘦咗」，經歷很多不開心和無力感，但亦慢慢恢復過來，「我都希望大家振作，反正係咪都要生活，我哋就好努力去生活」。

獲釋回家後逗留了約三小時，岑說，四年的分隔，令人牽腸掛肚，「最掛住一定係屋企人」。以往慣了不吃早餐，家人送他去工作便會「特登整個包」給他吃，這天，他提出想再吃這個包，家人便特意為他準備。返家後與家人相處，吃個包、聊聊天，「終於可以掂到佢哋，呢個係好激動、感動」。

是否自由的狀態？　「我唔知呀」

被問出獄後，有否收到提點或指示，岑停頓思考約 10 秒後，小心翼翼地說，總有很多人會溫馨提示他，包括友好的朋友會提醒他，出來要先了解情況；至於會否擔心「有啲嘢唔講得」，他苦笑：「一定有擔心有嘢唔講得，所以你見到我講嘢時我都喺度諗得好緊要。」

記者再問，他覺得現時自己是否自由的狀態？他說「我唔知呀」，指是否自由只能看新聞才知道，笑說「可能你聽日已經見我唔到喇，咁咪可能唔係一個自由嘅狀態」。

重返瀝源邨　「始終係一個我冇完成到嘅責任」

曾於 2019 年當選沙田瀝源區議員、在被控後辭職的岑子杰，也主動提到，「好掛住我嘅瀝源，始終係一個我冇完成到嘅責任」。他說對當區選民感到抱歉，「我諗佢哋期望我係可以做足四年，但我係自己辭職」。瀝源的很多事他仍關心，像街市夜晚上落貨還有沒有很嘈吵？電梯建成了沒有？他說待會都想返去看看，亦相約了朋友在沙田吃飯。

獄中曾處於輕度抑鬱狀態

還押期間，岑子杰爭取承認海外同性婚姻的司法覆核案，部分終極勝訴，他形容案件「對我嚟講係一個祝福」。他自言在獄中曾處於輕度抑鬱狀態，身型胖了很多，甚至與不熟的人見面 15 分鐘也有壓力，但這宗官司「令我覺得似乎仲可以有啲改變，令我覺得好似有返一種有力量嘅感覺，嗰單官司其實係幫咗我」。雖然爭取承認同性婚姻失敗令人可惜，但法院裁定須訂立替代框架，也是很大的改變。

暫時未打算離港

對於未來，岑子杰說「唔識點樣打算」，「對呢個世界我嘅認知，其實依家係啱啱第一日」，「未來可以做啲咩，應該做啲咩，究竟條紅線喺邊，我都要去重新摸索吓」，「人生係咪都會推住你前進，冇得停落嚟」。但他暫時未打算離港：「因為始終一啲對我嚟講好重要嘅人都喺香港，一個零距離嘅 long D 已經覺得好辛苦，如果真係一個長距離嘅 long d 我會覺得更辛苦。」

「我諗依家嘅香港人都習慣咗唔使講」

岑提到，這四年來有朋友選擇離開世界，他會想，如果能早些關心他，結局會否不同。既然出到來，他第一件事想先關心身邊的人，關心正在不同環境下受苦、活生生的人。有沒有說話想對香港人說？他思索了一下，先笑說「我諗依家嘅香港人都習慣咗唔使講」，接着認真地說：「我對自己嘅期許係記住受苦嘅人，因為我真係喺呢四年裡面，感受到好多嘅關心，呢啲關心對我嚟講好重要。」

歡迎追蹤以下平台，即時接收《集誌社》最新資訊，及付費訂閱支持！
【付費訂閱《集誌社》】
https://thecollectivehk.com/subscribe/
【訂閱《集誌社》Youtube】
https://www.youtube.com/@thecollectivehk
【Like 《集誌社》IG】
https://www.instagram.com/the_collectivehk/