FI專欄｜美國政府停擺即將結束？美股樂觀中帶隱憂｜人頭馬

話說一到11月，美國股市好似坐過山車咁刺激。呢兩日，市場大起大落。背後原因，主要係美國政府停擺、財政刺激措施、以及經濟疲軟指標三大主題推波助瀾。

整體嚟講，市場反應正面，主要指數上漲，但隱藏風險的確唔少，投資者要醒目啲，莫要盲目樂觀。

先講美國政府停擺。

今次美國政府停擺已經持續41日，創下咗歷史最長紀錄。美國參議院於2025年11月9日以60票贊成、40票反對的程序性投票通過咗將政府資金延長至2026年1月30日的法案。當中有八位民主黨參議員跨黨派支持法案，法案之後會送交眾議院投票，到時需要由特朗普簽署生效，政府先會恢復正常運作。

美國政府停擺結束現曙光，無疑為市場注入強心針，華爾街各項指數大幅上漲：S&P 500突破6,800點，納斯達克上漲約2.3%（5月以來最佳單日），巨型股指數漲約3%。AI股如Nvidia同Palantir繼上個禮拜拋售後反彈，道瓊斯期貨都跟住升。

不過，財政部長 Scott Bessent 警告，停擺可能拖累第四季度GDP負增長。隱憂仍在，投資者要小心。

另一邊廂，特朗普政府嘅財政刺激措施，又畀市場多咗幻想空間。

特朗普宣布計劃向大多數美國人發放2,000美元支票，資金來自關稅收入，金額預計約890億美元上下，其政策定位係作為貿易政策的直接收益；特朗普仲提議向空中交通管制員發放每人10,000美元的獎金，獎勵停擺期間堅守崗位的員工。但有人質疑，支票最早都要到明年先到手。

究竟侵侵係咪打嘴炮，就真係到時先知。

加上市場傳聞指，國家經濟委員會主席 Kevin Hassett 有機會被提名為下任聯儲局主席。呢個消息令到市場對聯儲局未來政策充滿猜測與懸念。

不過，經濟疲軟指標卻繼續向市場潑冷水。

美國公司在2025年10月宣布裁員約15.3萬個，較去年同期增長約175%，為20多年來該月份的最高數字；信用卡拖欠率達12.4%（2011年以來最高）；密西根大學消費者情緒指數降至50.3（1952年以來第二低）。聯儲局紐約分行行長 John C. Williams 話12月減息係「平衡行為」，主要考慮到經濟存在不確定性和不平等風險。

科技股特別因人工智能估值過高引發賣壓，主要投資銀行JPMorgan與高盛均警告科技股可能面臨10-20%的回調調整。能源股成為少數逆市上漲板塊，上漲約1%。

在全球地緣角度來看，中國放寬稀土出口限制，暫停對美關鍵貿易壁壘，都可能緩解美國科技供應鏈壓力。

高盛更預計，聯儲局未來可能再減息三次（12月一次，2026年兩次），利率將降至3-3.25%。

總括嚟講，呢幾日美股樂觀中帶隱憂，美國政府停擺將結束的消息，以及經濟刺激政策，推高美股各大指數，但經濟疲軟走勢及財政風險仍在，投資者記住要分散風險，唔好全押一注。

你有冇因為美國政府停擺消息買入AI股？留言分享吓你的看法啦。

Subscribe FORTUNE INSIGHT Telegram:
http://bit.ly/2M63TRO

Subscribe FORTUNE INSIGHT YouTube channel:
http://bit.ly/2FgJTen