馬拉松與人：Bobo 東京馬拉松

A trip down memory lane… 🇯🇵
東京馬拉松話咁快就過去，呢幾星期仍然沉醉於比賽當日嘅情景，仍然記得民間啦啦隊嘅熱情，仍然記得自己好輕鬆地跑完半程然後進入地獄嘅十公里再爬返上人間衝線嘅一刻。

由從前好憎跑步到今日竟然可以proud to say I’m a marathoner，一啲都唔係奇蹟，尤其呢幾月，當中嘅汗水同淚水已經唔係文字可以表達。

教練形容我為一個麻煩友，我的確又真係麻煩事特別多😂，但更貼切嚟講，我覺得呢幾個月自己係一隻打不死的小強🤭！

去年十月尾因為ITB被迫要暫停訓練，當時應該係我最沮喪嘅時候，每次只可以慢跑不超過二十分鐘，有時甚至只跑咗十五分鐘已經痛到冇辦法再跑落去，坐咗喺單車徑到流眼淚🥲，一直物理治療加自己平日不斷拉筋放鬆，大約十二月中開始可以慢慢跑返慢慢加量，直到剛剛一月完成渣馬兼pb，我先開始對自己有返信心。

再去到距離比賽只有一個月，即將要進入練習好關鍵嘅一個月，我又「陽咗」🫠，當日喺診所見到嗰兩條線，我又坐咗喺到流眼淚🫠，我好怕陽完之後會唔會有咩後遺症，令到之後嘅練習同比賽會出現障礙。幸好，呢一次好快好返，喺我怒飲水同怒瞓嘅情況下，第三日已經變返一條線，第四日已經開始跑返。

經過呢啲之後我心諗實冇死啦，都就嚟比賽，訓練又足夠，病又病完，M又嚟完，天氣報告都已經十分肯定比賽當日係大晴天。然後去到臨飛之前兩晚，我又突然肚痾，起初以為普通肚痾，點知幾乎痾到我脱水，用咗三卷廁紙🥲，又好好彩嘅係，訓醒一覺已經冇事。

關於Sub4：

或者好多人覺得Sub4並唔係一件相當困難嘅事，到我自己而家跑完，我感受係「沒有我想像中困難」，但絕不是容易事。

練習初期我將自己完賽時間預設為四個半鐘，我覺得以我咁樣嘅訓練量，四個半鐘完成係最基本吧。到後來跑完第一次30k，教練話應該可以415-420完成，第二次30k後，推前到405，到終極一課，教練話如果能夠完成呢個終極30k，就有機會sub4。

完成最後一個30k，教練已經話有九成把握可以sub4，但我仍然抱住一半半嘅心態，始終到真正比賽時你前面仲有多12k，我亦唔知自己最後12k究竟會出現乜野狀況，所以當距離終點剩返幾公里時，我已經十分肯定我能夠sub4，即使係咁，衝線一刻仍然忍唔住喊。

教練預計我能夠以357-358完成，最後我竟然除咗sub4，仲sub355，以3:54:23完成，已經超出我預料之外，簡直顛覆我對自己嘅認知😂。

前日官方照片已經出爐，以過往比賽嘅照片嚟講，我知自己大概會有好多崩壞嘅相，所以打算如果有一兩張靚嘅就買，但當我睇哂大會俾我嘅二百幾張相，我心入面只有一句說話：「SHUT UP AND TAKE MY MONEY！」 😂我從來都冇咁靚嘅跑步相🥲，然後從呢輯相入邊，我深深體會到咩叫做#你必須很努力才能看起來毫不費力 。

如果你而家已經跑緊步，或者你已經完成過半馬，我會鼓勵你去練一個全馬，去東京跑一次（因為東馬只有10公里同全馬），你唔會後悔的！

跑一個馬拉松不容易，享受地跑一個馬拉松更不容易。希望大家都能夠為自己嘅夢想咬緊牙關，夢想成真一刻你會知道，一切都值得。

Thank you, Tokyo 🇯🇵！

Please follow Insports Hub on Facebook & Instagram
https://insports-hub.com/
FB
https://www.facebook.com/insportshub
IG
https://www.instagram.com/insportshub/