周永恆貼短訊截圖反擊周曉彤　「有人求愛不遂作出報復」

周永恆（Roy）多年來負面新聞被封「世紀賤男」，2017年與趙頌茹離婚時被爆出軌及家暴；2018年與內地妻子陳薇（Britni）奉子成婚，育有一子，2023年再爆出家暴事件並鬧上法庭。日前有網民分享周永恆在港鐵車廂內與女子親暱相擁，傳出背妻「偷食」，周永恆向傳媒澄清相中人是其太太陳薇，陳薇昨日（3月3日）在IG限時動態發文，親證與周永恆正辦理離婚手續，解釋兩人在車廂相擁是因當日對方有家人離世。

另一邊廂，前女子組合MVG成員周曉彤（Ivy）早前公開指周永恆瞞婚，又強調兩人並不是戀人，對方只是她多年來的追求者。其後她接受傳媒訪問，透露因為因為拒愛，周永恆做出不同騷擾行為，令她情緒崩潰。她向傳媒提供多張CCTV截圖，周永恆赤裸上身在她家門外，警員亦有接報到場。不過，周永恆今日發長文否認報道內容，更上載多張來電和短訊截圖，當中「Ivy Chow」曾同日多次致電給他，另外兩張為「vyy」於2月27日給他的訊息，周永恆直指有人求愛不遂恩愛成恨而作出報復。

周永恆分享多張來電和短訊截圖，寫道：「由於近日嘅報道過份發酵，當中有太多不實嘅事情 本人希望澄清一下，當日本人在港鐵車廂內擁抱傳媒所講的妙齡少女，實情為我個仔嘅媽咪，當時我正在痛哭正在被安慰，中國人百行以孝為先，當日我爸爸離開咗個世界去咗天堂，就算我哋嘅婚姻狀態點都好，呢一世都係屋企人，係個仔嘅父母請問有錯嗎？網絡欺凌同不實嘅報道已經唔係第一次，由於過度氾濫嘅網絡不實資訊已經影響到小朋友嘅正常生活。」

周永恆列出幾點澄清：「呢一次我唔能夠再啞忍。所以有幾點我想澄清一下：1：上年六月14號已經同太太正式分居，兒子交由太太照顧。期間兒子放假亦間中有見面。2：我同周小姐，相識多年，於上年9月12號被問候之時，之後一個星期左右開始情侶關係，期間每月提供不限於一萬元左右金錢援助用作租金及水電費。嗰段時間我同太太已經成為咗親人，同埋朋友亦都有知會。3：本人從來沒有於報導所及的滋擾，實情為由於多次性格不合及價值觀大不同被分手，被阻止約見兒子及提供贍養費。東西被多次掉到門外，本曾經亦試過報警求助取回東西。4：周小姐提出分手後多次要求復合不果並在得知家父過身後提出陪伴，見附件截圖：以上四點希望大家能夠辨別清楚有人求愛不遂恩（因）愛成恨而作出報復。」

周永恆表示只希望好好工作養育家人：「嘗試問一下到底乜嘢係愛？乜嘢係恨？我已經死老豆，點解大家唔可以留一線？ 點解要破壞曾經嘅美好？我已經好努力咁重新做人，每日返工十多個鐘做運輸，想過返啲正常人有嘅生活，我只係一個好鍾意音樂嘅運輸工人，希望可以賺啲錢畀贍養費個仔同埋前妻，點解唔畀條生路我？網絡欺凌已經唔係第一日嘅事，我可以承受到，但係唔係個個人承受到，我曾經做錯過已經好努力咁改，我冇一腳踏兩船，我冇再犯法畀警察拉，腦部手術之後知道自己有後遺症情緒問題，已經睇緊醫生食緊藥，可唔可以畀條生路大家行？唔好再騷擾我身邊嘅人，我頂得住，佢哋頂唔住，以後唔拍拖唔緊要，冇女人都唔緊要，我淨係想好好工作，養育個仔照顧媽咪，可以嗎？」。

周永恆之後再出另一帖文寫道：「明白咗啲嘢咁，冇希望就唔好失望，冇恐懼就唔需要平安，冇愛就唔會有恨，離開咗個循環咁樣，以前嘅我揈嚟揈去，喺個循環入面好似洗衣機咁兜兜轉轉，好想得到一啲，因為失去嗰啲， 但係到最後係乜嘢都冇發生過咁樣，混沌定係空？分別得到嗎？擁有定係失去？可以把握到幾多？ 自己嘅睇法定係別人嘅睇法重要嗎？事實嘅根本重要咩？輕輕鬆鬆就係輕佻，沉沉重重還是過於認真？因為呢個世界畀我哋結構到係二原對立因果糾纏，最後就係分別中選擇，放手等於擁有，知道咗啲唔應該知道嘅嘢，情願唔知一啲應該知道嘅嘢，到最後都係一場空。」