Google奧運廣告惹批評竟然用Gemini AI代寫粉絲信被批評扼殺創意

近年生成式 AI 大行其道，功能都越嚟越強，要完成唔同類型嘅作文，只需要幾秒鐘就搞掂，相當方便。不過近日 Google 一個有關 Gemini AI 嘅奧運廣告就備受爭議，最後 Google 更決定撤下廣告。

喺一條60秒嘅廣告入面，一個老豆用 Google Gemini AI 代筆，幫個囡寫信比佢好崇拜嘅奧運田徑偶像 Sydney McLaughlin-Levrone，而呢一幕就引嚟咗作家 Linda Holmes 喺社交平台批評話:「邊個會想收到一封由AI寫嘅粉絲信？」美國紐約州雪城大學高級媒體教授 Shelly Palmer 亦在網誌文章指:「呢樣就係我哋唔想比AI做嘅事。」同時，亦有人批評呢個廣告助長父母誘導孩子依賴AI，阻礙自我表達能力。

收到眾多負評後，Google 表示會逐步在電視上撤回廣告，暫時只會喺 YouTube 上保留。同時亦有向大眾解釋，呢個廣告係展示 Gemini AI 點樣為尋找寫作想法嘅人「提供起點、思想啟動器或早期草稿」，讓AI可以成為提高人類創造力嘅工具，但都係無法取代人類嘅創造力。