大角咀厚嫩牛舌芯　慢煮日式定食小店｜大角咀｜日嚐

最近碌到個threads好中肯，講點解啲小店出咗名，就好難keep到質素，其實小店始終係小店，情況好似京都over tourism咁，個個都想享受，但空間資源有限，要滿足所有人唔係咁易。

就好似呢間最近重開嘅鋪頭咁，做齊慢煮牛定食、甜品、Cafe嘢飲，仲要有厚切牛舌芯，係人聽到都會想衝去食。但鋪面唔大，咁多手工嘢翻枱慢，排隊就一定，希望大家衝嘅速度不要太快，非繁忙時間去就最舒服。

-
🥩慢煮厚切牛舌芯 ($128)
肯定係大家最愛嘅牛舌芯，肉量黎講係我見過最多嘅一間，切長條形鋪到滿一滿，慢煮真厚切粉嫩，入口滲滿油脂香真幸福。

🥩慢煮美國封門柳 ($118)
好多人見紅色就以為係好嫩，但其實只係慢煮溫度未夠令肌紅蛋白變色，封門柳仲係封門柳，油脂少肉感重，幾紅都嫩唔過牛舌，但勝在肉味濃郁，仲配埋自家柚子胡椒鹽。

🔸套餐 - 配手工沙律兩款、餐湯、熱茶、飯
🥢青蘋果紫薯球 🥢醬油漬大根
🥢蔥拌碎蕃茄 🥢南瓜牛乳雞蛋沙律
🥢追加醬油蛋 (+$8)
🥢追加明太子 (+$8)
🥢飯轉蕎麥麺 (+$5)
出街食牛肉一向唔平，呢個價錢一Set其實真心抵，仲有咁多款靚配菜揀，記得加埋隻醬油蛋/明太子，撈飯撈麵都一流。

🍗椒鹽雞扒煎蛋 (午市限定 $58)
仲有呢個Lunch真係冇得輸，58蚊咁大份雞扒，大大塊啖啖肉，微微脆皮，椒鹽香口惹味，搭埋隻煎蛋，仲配埋款沙律同漬物，抵到痴線。

🥞咖央牛角包窩夫
🍰陳皮巴斯克芝士蛋糕
值得一讚呢到仲要有啲靚甜品，前者咖央牛油配多士見得多，但配酥皮窩夫真少見，而且連隻咖央醬都自家製，後者巴斯克軟滑，搭埋陳皮醬非常清香。

🍹開心果椰子咖啡
🍹士多啤梨朱古力奶

-
日嚐 (新店)
🗺️大角咀大全街13號大同新邨地下A號舖
📞6676 1236

日嚐
🗺️紅磡明安街10號寶石戲院地下F號舖
📞6676 1236
❇️佢地大角咀呢間係重新回歸新開，得呢到有慢煮厚切牛舌芯，鋪頭唔大可能要等位，非繁忙時間應該會好啲。

▼Follow foodiegogoooo
Instagram: https://www.instagram.com/foodiegogoooo/