香港美食：【牧羊少年咖啡館進駐機場！6月中進駐！即睇機場限定MENU】

更新於 05月28日10:27 • 發布於 05月27日10:41 • 香港人遊香港

牧羊少年咖啡館｜牧羊少年咖啡館進駐機場！

香港嘅文化地標又添新成員啦！大家熟悉嘅「牧羊少年咖啡館」6月將會登陸香港國際機場接機大堂中庭，成為迎接各地旅客嘅第一道香港風景！呢間自2012年喺深水埗誕生嘅咖啡店，一直以旅遊為主題，除咗餐飲服務之外，仲會定期舉辦旅遊分享會、音樂會、文創比賽等活動，依家終於有機會將香港文化帶到國際大門口啦！今次嘅機場店除咗保留原有嘅招牌餐單之外，仲特別推出機場店限定嘅「創意咖啡系列」。系列嘅靈感嚟自台灣冠軍咖啡師，將香港人熟悉嘅傳統糖水文化融入咖啡之中，推出楊枝甘露、紅豆沙、芝麻糊、合桃味咖啡等等。店舖設計方面更加有睇頭，牧羊少年特別邀請咗本地得獎室內設計公司以「舊文化，新呈現」為主題，融入電車綠色調、龍鳳木雕、霓虹燈、茶樓地氈等香港元素，將傳統文化以現代方式呈現，為旅客帶來最地道嘅香港第一印象！大家有冇去過機場接送親友嘅時候唔知去邊等？而家就可以去牧羊少年坐坐，機場行程一定要加埋佢！

▲ 香港本土人氣咖啡品牌「牧羊少年咖啡館唔單止係飲食場所，仲經常舉辦旅遊分享會、音樂會、文創比賽、攝影展等活動，係一個充滿文化氣息嘅地方。而家佢去到機場，就可以畀世界各地嘅旅客一踏入香港就感受到我哋嘅文化魅力！

▲ 店舖設計特別搵咗本地得獎室內設計公司，以「舊文化，新呈現」為主題打造空間。全店以Pantone官方唯一一款以香港命名嘅綠色 -「Hong Kong Tram」電車綠為主色調，等大家一入去就有強烈嘅香港感覺！

▲ 除此之外，設計團隊仲將龍鳳木雕、霓虹燈招牌、茶樓金錢花地氈、通花鐵閘等傳統香港元素都融入店舖設計，甚至連80年代香港黑幫文化中嘅仿虎皮裝飾都有！呢啲細節令成間舖充滿香港情懷，等每位嚟到呢度嘅人都能感受到香港嘅獨特魅力！

▲ 今次機場店嘅最大賣點，就係推出咗四款機場限定嘅創意咖啡系列啦！靈感來自台灣冠軍咖啡師林東源老師，團隊將香港傳統糖水元素注入咖啡之中，推出「紅豆沙沙」、「合桃物語」、「芝麻開門」同「楊枝甘露」。呢啲唔係簡單嘅混合，而係透過風味嘅平衡與轉化，等大家可以用一杯咖啡感受香港傳統嘅味道！