少爺占的跑步理念：「你在堅持什麼？」
提起跑步的藝人，很少人會聯想到少爺占，反而會想到艾粒另一位成員 Donald。其實亞占的跑齡都不淺，到底亞占為什麼會跑步？跑步又帶給亞占什麼意義？
Q：近期節目中經常提到你會跑步，是因為 YEAHS 要開 show 而開始練習嗎？
係有關係嘅，6月中會開 show，跑步可以令個人精神啲、瘦啲，最重要係唱歌時條氣會順啲。
尤其今次係 band show，十幾年前未有運動習慣時，試過唱到差啲窒息、休克。雖然街頭 busking 冇問題，但舞台上要跳住唱，真係要有體能，所以每次開 show 前都會靠跑步練返條氣。
⸻
Q：會跑幾耐？距離大約係？
通常會跑同 show 差唔多長嘅時間。初頭由半個鐘開始，加到45分鐘，再慢慢練到可以跑到兩個鐘。
如果係 Talk show 或艾粒啲 show，冇咁多輸出，就練到可以輕鬆跑 45 分鐘左右就夠。
⸻
Q：這是前輩教你的秘技？
唔係，係我自己諗出嚟嘅，哈哈 😆
⸻
Q：你係幾時開始養成跑步習慣？
應該係 12、13 年前跑渣打馬拉松開始。當年仲未流行跑步，個口號係「Run for a Reason」，而我嘅 Reason 係希望個仔出世時健健康康。
練跑時會由西灣河跑去北角，再跑返轉頭。記得完成 10K 時，時間係一個鐘多少少。
⸻
Q：你做過幾個音樂組合，包括 I Love You Boyz、艾粒、野仔，到而家嘅 YEAHS，想做嘅音樂有啲咩唔同？
YEAHS 嘅 Chris（何兆基）本身都係野仔出身，2023 年我哋想做一啲唔同方向嘅音樂，原本諗住玩電子音樂，唔再係 band sound。
不過做咗幾次 show 後，發現自己始終都係鍾意結他聲、鼓聲，所以依家返返去做搖滾，可以話係另一個進化，加少少艾粒、加少少野仔嘅感覺。
⸻
Q：唔同時間做唔同音樂，係受聽歌習慣影響定係其他原因？
其實係會先諗下自己做到啲咩。雖然我都鍾意聽 R&B、Hip Hop，但就唔係好做到呢類音樂。
但見到而家好多本地音樂人做得好，唔一定要黑人 yo yo yo 先得，所以 YEAHS 都加咗少少 Hip Hop 元素，變咗係「自己鍾意 + 自己做到」嘅風格。
⸻
Q：最近鍾意聽咩音樂？
而家上車基本都唔係我揀歌，係我個仔揀。最近佢鍾意聽 Ginger Wood，係一位亞洲人喺美國發展嘅電子音樂人，啲歌聽落好舒服。
我間唔中都會建議佢聽返啲舊歌，例如 Carpenters。
⸻
Q：你今次出新碟，心態上有冇咩唔同？
今次會出一隻實體碟，10 首歌，叫《大致上完美》。個概念係：唔需要逼自己十全十美，做到大致好已經係一種完美。
就好似跑步咁，唔一定要跑全馬或者破個人紀錄，跑得開心、健康就得啦。
⸻
Q：錄音過程有冇咩特別經歷？
上年12月我特登飛去加拿大，同 Chris 灌錄6首歌。雖然未全部寫好，但9日時間入面我哋錄咗歌、影咗 MV 同演唱會相。
以前開 show 通常都係電台工作之間抽時間做，但今次係全情投入，好專注咁扮做一個專業歌手，幾 enjoy。
⸻
Q：咁樣錄音，質素會唔會好啲？
一定會好啲。以前喺電台做完節目先錄音，聲線會攰；今次就係每日拎兩至三個鐘靚聲時間去錄，聲線好咗好多，但都幾奢侈，要請假飛去加拿大。
⸻
Q：Chris 長駐加拿大，點樣合作？
其實已經習慣咗，佢搬咗返去加拿大四年。
我哋時間配合得幾好，香港朝早就係我哋傾計時間，四時左右就是 Chris 睡覺時間，我就會電台上班。香港夜晚 Chris 開工時我就瞓覺，咁樣反而可以成日廿四小時做嘢。
加上而家電腦技術方便，Chris 喺加拿大整好初版，返香港用一星期 rehearse 就搞掂。
⸻
Q：如果揀一首你唱過嘅歌去代表跑步，會係邊首？
達夫俾問題時就估「一切都只是過程」（筆者按：是艾粒的歌曲），但現在是 YEAHS 開 show所以就會揀《你在堅持什麼？》。
呢首歌有雙重意思，可以係問人，亦可以係問自己。跑步辛苦時都會問自己：「我為咗咩堅持？」但當你記得堅持嘅原因，例如跑完精神啲、健康啲、靚仔啲，其實就係自己收穫。
⸻
Q：節目中提到：開演唱會其中一個目的就是設計周邊產品來滿足自己的設計喜好，會唔會推出跑步用品？
應該唔會啦。跑步用品要講技術、好難做。我又唔想將興趣變做工作，做咗就算。
特別是演唱會紀念品，演唱會完了就算，不會追究當時這個設計好與壞，比起經營一個品牌簡單。
⸻
Q：你鍾意着闊身衫，跑步會唔會唔方便？
其實我鍾意無束縛感，所以我最鍾意游水，着條泳褲就得。跑步都係著 oversize 背心跑。雖然冬天都係背心加風褸，熱咗就除。夏天乾脆唔着上身。
亦因如此，我多數只會做一個人的運動，很難跟別人合作玩Team sports。若果要選擇一個球類運動，應該是羽毛球或乒乓波，因為都係一個人打就可以了。
⸻
Q：你而家跑步會選擇邊啲地區？
搬咗新屋後，主要係跑城門河，由大圍跑去大埔再返轉頭，大約一個鐘。
以前亞仔學劍時，要等佢放學，我就喺佐敦跑去西九，雖然距離不太長，但總好過坐喺車度浪費時間咁等。
⸻
Q：之後會再參加比賽嗎？
其實 COVID 前有諗過參加，但疫情打斷咗，加上照顧仔仔都攰，冇乜動力再跑。所以大部份時間只會在做show前跑步練氣，完 show 之後，就欠缺跑步的動力。
希望未來可以跑一次半馬作目標，唔強求破紀錄，想跑得開心啲。
⸻
Q：你個仔鍾意跑步嗎？
小朋友通常唔鍾意跑，但我都有同佢一齊跑下。不過佢成日一開始就衝線，我要教佢點樣留力。
佢平時每日都要跳繩訓練，跳三千下，所以運動量都夠啦。
⸻
Q：你揀跑鞋有咩要求？
我係鍾意厚底跑鞋，因為十幾年前跳舞傷過韌帶，跑耐咗會痛。厚底波鞋緩震好啲，保護性高，跑起上嚟舒服啲。
⸻
Q：跑步有冇咩目標？
本身想一班朋友一齊報比賽，但而家好多都移民咗去英國、加拿大。短期目標可能都係跑返渣馬啦。
總結
對少爺占嚟講，跑步冇乜大道理，唔一定要贏人、唔一定要破 PB。
就好似 YEAHS 首歌咁問：「你在堅持什麼？」
原來答案唔一定要宏大，可能只係一句：「想開 show 唔好休克」，又或者「想繼續享受自己做緊嘅事 – 做自己喜愛的音樂、跑自己的節奏。」
Please follow Insports Hub on Facebook & Instagram
https://insportslab.com/
FB
https://www.facebook.com/insportslab
IG
https://www.instagram.com/insportslab/