跑步與人：Candace
1) 跑步年資？為什麼開始跑步？
跑步年資大概 6 年。當初因為想減肥每日都去公園散步，有一日遇到個朋友邀請一齊跑步，開頭都唔太願意因為覺得好辛苦，不過一邊跑步一邊傾吓計又幾開心，習慣咗之後就開始約埋一齊日日去跑，直到之後當咗恆常運動控制體重同保持身體健康，順便減壓，每星期都會輕鬆跑吓。
2) 有沒有跟跑會或教練跑？選擇原因？
以前都有上跑步班，不過好多時 1 個月就放棄，因為覺得太辛苦，哈哈。所以一路都無特別去訓練。2022 年無意同朋友傾開計介紹我去跑班，開頭我都有啲抗拒，怕好辛苦又跟唔上，都考慮咗好耐先再試。加入咗 Hill and Heal 1 年半，而家跟怪獸 sir 訓練，教練好用心教，無論訓練同比賽都俾到好多意見，上堂都好開心，一班同學一齊互相推動，一齊進步，落堂一齊食飯，一齊去海外比賽，又會喺終點接哂所有同學，係一個好溫馨嘅跑會。
3) 最喜歡的跑步用品品牌？最喜歡一對跑鞋？
幾個牌子都鐘意，山系用品最鐘意 Hoka，路跑用品最鐘意 adidas。最近最鐘意著 adidas 嘅 Boston12，easy 同速度課都好合適，顏色又靚。
4) 另一半對有跑步嗎？對你跑步有意見嗎？
另一半都有跑步，第一次傾計都係因為跑步有啲共同話題先發展到落去，之後慢慢俾佢影響咗先至開始行下山，仲一齊玩埋比賽添。
基本上佢 100 分支持我，有時會陪我一齊練跑，仲入埋同一個跑班一齊上堂，要練馬拉松嗰時又會做埋配速，又會照顧埋我啲小情緒，從來都無怨言。
佢最有意見應該係有時操練早出晚歸就會成日見唔到我，要一個人獨守空房。
5) 喜歡跑山還是路跑？路跑跟山跑有什麼不同感受？
鐘意跑山多啲。主要因為路跑通常都喺運動場或者跑圈，啲風景覺得比較悶，加上不停重複用同一組肌肉維持速度，感覺上較攰，好多時都係 easy run 一個鐘，好少跑長課。跑山相對比較有趣，山上多唔同嘅路況，有樓梯斜路多啲變化，可以轉換下。風景又靚，不同天氣同一個地方都會有唔同景色，每次都有新鮮感，仲有陣陣涼風，上到山頂會好有滿足感，加上中途一定要會有補給時間可以短暫休息，所以相對上跑山就算時間長都唔會覺得好辛苦好悶。
6) 最深刻的一場賽事？原因？
最深刻係 2022 年 CCC，比賽半年前唔小心拗斷左腓骨，當時好堅持想完成，治療咗 5 個月後物理治療批准先可以開心跑步同行啲簡單山路，喺大帽山練咗 3 課就落場比賽，嚴重訓練不足，加上啱啱先進入康復階段好大機會比賽中途會腫痛，但考慮完都係決定要比賽。去到比賽中途好多次想放棄，好彩有老公陪我一齊慢慢走，又照顧我情緒，加上好多朋友唔瞓覺都不停 send message 鼓勵我，最終都不負眾望非常辛苦咁完成。其實無諗過咁多朋友都咁有心支持我，一路上不停收到打氣，好似有一班人陪住我行咁，就連去終點都望住直播睇衝線，好開心好感動！
7) 海外比賽跟香港比賽的分別？
海外賽氣氛好好，無論山賽同路賽都好多人打氣，香港就相對無咁熱鬧，可能始終地方較細，除咗一年一度嘅渣打馬拉松比較熱鬧之外，氣氛都比較一般。
海外賽最開心就係補給品豐富啲，種類較多，特別係日本嘅比賽補給最好，好多特色食品，又好好味；歐洲地區就通常都係芝士，火腿等等，就未必啱香港人口味啦。
去海外比賽仲可以順便去個旅行，例如日本泰國就係好好嘅選擇。
8) 最想到外國哪裏跑比賽？山賽還是馬拉松？
暫時最想去瑞士意大利嘅山賽 UTMR（Ultra Tour Monte Rosa），會經過好多好靚嘅山，想用四日去體驗不同風景。
9) 最喜歡的練習場地（原因？）
一定係飛鵝山道！其實唔鐘意跑斜路，每次都覺得好辛苦，但每次堅持到山頂都覺得自己盡哂力，加上通常都一班人一齊跑會開心好多，山頂又可以見到好靚嘅夜景，每次唔同天氣都會有唔同嘅風景，所以特別開心滿足！
10) 有沒有因為跑步而放棄了其他運動？
跑步嘅訓練佔咗日常大部份時間，餘下既時間大部份都用黎上瑜伽同跳舞，有時啲朋友都問點解唔放棄其中一樣，專心跑步？但諗真啲結果每一樣都唔想放棄，唯有時間同體力分配上做好啲，如果有比賽可能就要以操練同安排休息優先，盡量兼顧兩邊嘅練習。
11)除了跑步，有沒有做交叉訓練？（例如舉重/游泳/瑜伽）對跑步有沒有幫助？
除咗跑步會做下瑜伽同肌力訓練，保持返肌肉嘅力量同柔軟度，我覺得對跑步都有一定幫助。
12) 現時跑步目標是什麼？
首先希望可以無傷患繼續開心咁跑步，參加多啲海外比賽體驗下唔同地方嘅跑步文化。其次希望可以提升路跑嘅速度，克服自己好討厭嘅 interval 訓練，提升跑山表現。
13)跑完步最想吃什麼？
最想就係一班人去食大排檔，一齊飲肥仔水！
最後一題）有什麼社交媒體可以找到你？
IG: can.yyyu
Please follow Insports Hub on Facebook & Instagram
https://insports-hub.com/
FB
https://www.facebook.com/insportshub
IG
https://www.instagram.com/insportshub/