尷尬得嚟又好禮貌！Olli靠呢個表情洗版社交平台

近年來，社交媒體掀起一波又一波的迷因熱潮，而一隻表情淡定、略帶無辜的白貓，憑藉一臉「尷尬但有禮貌」的神情在網上走紅 —— 牠就是被網民封為「尷尬貓」的 Olli。

迷因界新天王！尷尬貓Olli靠一張無辜臉爆紅

「尷尬貓」Olli最早出現在IG帳號 @polite_cat_olli_official。牠以一臉呆滯無辜、坐姿端正、眼神飄忽嘅樣貌爆紅網絡 —— 完美呈現出打工仔遇到上司講無理要求時，只能擠出尷尬又禮貌微笑嘅狀態。

該帳號由飼主打理，自2021年開始分享Olli日常照片同短片，再配以自嘲又搞笑嘅文字說明，迅速吸引大量網民追蹤。

隨住尷尬貓圖片喺社交平台瘋傳，牠嘅影響力由台灣、延伸至香港、日本等地，引爆二次創作熱潮，變成各大社群熱話。從一隻平凡家貓變身做社群寵兒，Olli成為集搞笑、治癒於一身嘅迷因明星。

尷尬又不失禮！「尷尬貓」成Z世代情緒出口

Olli嗰種「唔自在但又唔想失禮」嘅神情，喺網絡上引發共鳴，成為不少網民心中嘅社交尷尬代表。無論係飯局上唔識搭話、定係遇到上司冷笑，牠嗰個「我盡力啦」嘅表情就好似替大家講出心聲。

呢類迷因除咗搞笑之外，更成為Z世代排解情緒、表達壓力嘅方式——用幽默、用自嘲，來面對現實世界嘅無力感。

從「尷尬貓」看迷因經濟：你屋企隻貓都有機會爆紅？

Olli喺網上爆紅之後，唔少人開始將牠製成貼圖、T-shirt、杯、手機殼等週邊產品，仲有插畫師同設計師主動搵上門合作。雖然現階段帳號未有完整品牌化經營，但Olli已有明顯IP潛力。

其實，動物迷因早已成為社群經濟一部分。「Grumpy Cat」一樣由一張表情照變成全球紅星，證明動物唔只係寵物，更可以成為品牌、甚至經濟收入來源。

隨住Z世代與Alpha世代成為主力消費族群，呢類具視覺特色嘅寵物形象愈來愈有商業價值。而迷因文化其實亦係「數碼原住民」嘅情感語言，用動物表情傳達焦慮、自嘲與情緒——講唔出口，用圖都講到。

咁講句老實話：你屋企嗰隻成日扮唔理你嘅貓，或者成日發呆嘅柴犬，有可能就係下一個社群爆紅明星！