蔡嘉欣搭廉航呻行李費貴過機票　住180度海景房補數

有「拜金港姐」之稱嘅藝人蔡嘉欣，最近同家人同遊雲南，今次6日5夜雲南大理、麗江之旅，佢竟罕有地搭廉航，嘆慣嘅佢即對廉航一系列安排大感不滿，仲出Post鬧爆，完工唔畀面！

蔡嘉欣連日來分享旅行靚相，除入住4,800人民幣（約5,250港元）一晚嘅180度海景房之外，又體驗680人民幣1位（約744港元）嘅網紅餐廳，一行人又於當地拍攝民族寫真，蔡嘉欣自己都大讚體驗100分。

而蔡嘉欣一行人今次就一反常態搭廉航，不過佢大呻：「我們第一次乘坐國內的廉航，原來我哋買機票時冇購買到行李（自己唔知），然後廉航竟然細篋不能hand carry，全部都要寄艙，嚇到我立即把行李的全部相機和電腦拿出來，然後每個行李每公斤收費$20，我們咁多人淨係畀行李都畀咗千幾蚊，貴過張機票。」

咁都未算，蔡嘉欣對乘機過程就非常不滿，拍攝機上情況，上機後全部人被迫聽連續10分鐘開咪轟炸式廣告，蔡嘉欣要戴住耳塞，期間不斷搖頭，又咬牙切齒瞪大眼，去到尾空姐仍不斷狂Sell，直至聽到空姐介紹最後一款產品，蔡嘉欣先鬆一口氣。

東網網站 : https://on.cc/東網Facebook專頁 : https://www.facebook.com/onccnews/