王耀祖宣佈離開田豪祖3寶　「愛兩位拍檔愛到不得了」

由貴花田、曾志豪、王耀祖於2021年6月離開港台後組成「田豪祖3寶」，YouTube頻道有逾11萬訂閱者。阿祖在11月24日於社交平台出帖文，宣佈將於12月中離開「田豪祖3寶」。他強調「做得好開心，我愛兩位拍檔同大家愛到不得了，亦冇計劃離開香港。」

阿祖直言離開是困難但深思熟慮的決定：「阿祖將會離開田豪祖3寶喇，last day會係12月12日。可能大家會好意外，呢個係一個好困難但深思熟慮嘅決定，唔需要有任何揣測，我做得好開心，我愛兩位拍檔同大家愛到不得了，亦冇計劃離開香港。只係……唔同階段嘅我，喺工作上，人生中，仍然有唔同嘅嘢想嘗試，想挑戰，而家唔做，我怕我會錯過，但我永遠都唔會忘記呢四年半嘅旅程，每一日我都覺得好感恩，多謝你哋令我相信，人依然係善良同美麗。」

「寶粉們，多謝你哋同我行咗好多路，（死……諗起都想喊）每一個擁抱，每一個留言，Pop Up store及每次活動嘅人龍，仲有好多好多⋯⋯喺我低谷時嘅陪伴、喺Molly離開，我經歷Depression嘅時候（其實我冇公開講過，不過你哋陪我走過了）多謝，感恩，行過就係行過，我永遠唔會忘記，多謝你哋畀咗咁多愛同回憶我，love you all. 豪仔、阿田，由電台到Channel，十幾年嘅時間，我知道去到邊我哋都分唔開，多謝你哋畀我同你哋一齊行，由冇到有，由零到十一萬subscribers，我哋行咗段好夢幻好精彩嘅路，多謝你哋！Channel以後就交晒畀你哋喇，我冇擔心，只係轉用另一個身份同你哋行，之後我會係寶粉，繼續支持你哋，如果你哋有咩甩轆，我一定第一個message你哋，你哋係避我唔到㗎！」

「寶粉請你哋放心，我哋又唔係永別，之後喺街上面見到我，你哋可以繼續好大聲咁樣叫「祖祖」，我哋依然會大大力咁擁抱。你哋依然可以嚟睇我演出（小小預告：26年5月我會做返演員喇！）完Show後我一樣會逐個同你哋影相，我哋繼續可以喺社交平台上面互動，仲可能有無限個可能𠻹。如果呢幾年阿祖、大洗蓮，或者人妻裏面每一個女角色令你笑過開心過，容許我講聲謝謝，能夠令別人快樂，係我最大嘅幸運同得著。呢段我哋一齊行過嘅路，會永遠永遠刻喺我心入面，一個好好好重要嘅位置。Love, 祖」