蔡思韵婚後首亮相　與老公劉俊謙各自搵食

藝人蔡思韵與劉俊謙上月於日本低調完婚，榮升劉太的她，今（5日）亮相活動，這亦是她婚後首次在香港公開露面，容光煥發的她，笑言跟老公一結婚便各奔東西：「我要去韓國拍戲同到台灣宣傳，佢亦都要拍戲，只係中間有啲時間可以見過兩眼，食餐飯。」

思韵指婚後還未有計劃度蜜月，因計劃趕不上變化，加上劉俊謙要拍戲，但她都有諗過想去歐洲度蜜月：「好想放一個長假，休息一個月都唔係好奢侈啫，工作、生活要平衡（想喺新年成事？）都想。」

問到何解選在日本結婚，她則表示：「喜歡日本教堂，氛圍好溫馨、莊嚴，計劃咗大半年，保密功夫都做得好好，我哋都比較低調。（會唔會補番簽字？）唔話你知，都唔會擺酒，因為結婚個陣都請咗屋企人同至親好友嚟。（慣咗劉太呢個稱呼未？）未慣，阿謙嘅粉絲都係劉太嘛，鍾意阿謙嘅人，我絕對唔會介意叫佢哋做劉太，我一向都支持一夫多妻，最緊要佢哋鍾意阿謙（咁你先係正室嘛！）係囉。」

早前馬志威大讚蔡思韵好太太，是廚藝高手，她讚番對方是一位好老師：「佢煮嘢好叻，我哋成日去佢屋企食飯，我順便偷師（咁你廚藝點？老公畀幾分？）有進步空間，至於幾多分你要問番佢。」

蔡思韵與劉俊謙因合作電影定情，問她婚後會否都想兩公婆再合作拍戲？她笑言：「我好Open，會接受唔同挑戰，無問題。（有無生Ｂ計劃？）長輩無催，自己就未有計劃，因有兩隻貓ＢＢ要湊，好忙，想實現自己夢想先。」

東網網站 : https://on.cc/東網Facebook專頁 : https://www.facebook.com/onccnews/